घरगुती साहित्यातूनच तयार करा झणझणीत कोष्टी डाळ-कांदा; विदर्भातील खास रेसीपी एकदा पाहाच

विदर्भाची खाद्यसंस्कृती अख्ख्या महाराष्ट्रात फेमस आहे. विदर्भातील मराठा पाटोडी, सावजी, यासह डाळ-कांदा देखील प्रसिद्ध आहे. विदर्भ कोष्टी डाळ-कांदा अनेक खवय्यांना भूरळ घालतो. त्यामुळे शाकाहारी जेवणात या पदार्थाला मोठी पसंती असते. हाच विदर्भ कोष्टी चमचमीत डाळ-कांदा घरगुती पद्धतीनं कसा बनवायचा हे वर्धा येथील गृहिणी कीर्ती अलोणे यांनी सांगितली आहे.

विदर्भ कोष्टी डाळ-कांदा रेसिपी ही घरगुती साहित्यातूनच तयार करता येते. त्यासाठी प्रामुख्याने 1/3 वाटी भिजवलेली चना डाळ, अंदाजे अर्धा किलो कांदे, आलं लसूण पेस्ट घ्यावी लागेल. तसेच चवीनुसार मीठ, हळद, तिखट, थोडा गरम मसाला, धने पावडर, जीरे पावडर, तमालपत्र, तेल 1 वाटी, धने आणि खोबरे पेस्ट, कोथिंबीर आदी पदार्थही आवश्यक आहेत.

या साहित्यातून 4-5 जणांना पुरेल इतकी भाजी तयार होईल. त्यामुळे तुम्ही गरजेनुसार साहित्य कमी जास्त करू शकता, असे अलोणे सांगतात.

सर्वप्रथम 5-6 तास चणा डाळ भिजवून घ्यायची आहे. कढई मध्ये तेल गरम करून घ्यायचे. गरम तेलात बारीक चिरलेला कांदा अ‍ॅड करून कांदा शिजायला ठेवावा. कांदा शिजण्यासाठी 10-12 मिनिटाचा वेळ लागतो. कांदा शिजल्यानंतर त्यात धने खोबऱ्याची पेस्ट आणि थोड्या वेळाने आलं लसूण पेस्ट अ‍ॅड करावी.

दोन्ही पेस्ट चांगल्या शिजल्यानंतर आधी धने-जिरे पावडर, घरी उपलब्ध असलेला मसाला अ‍ॅडकरून मिक्स करावे. त्यानंतर हळद आणि तिखट अ‍ॅडकरून चांगले शिजू द्यावे. (मीठ लगेच घालू नये कारण मिठामुळे डाळ लवकर शिजणार नाही)

अंदाजे 2 मिनीटांनी गरम पाणी अ‍ॅड करा. आता भिजवून ठेवलेली डाळ अ‍ॅड करून पंधरा मिनिटे शिजण्यासाठी ठेवावे. डाळ चांगली शिजल्यानंतर मीठ अ‍ॅड करा. पुन्हा थोडा वेळ शिजल्यानंतर आता भाजीला चांगली तरी आलेली दिसेल. भाजीवर कोथिंबीर घालून आता विदर्भ कोष्टी स्टाईल झणझणीत डाळ- कंदा खाण्यासाठी तयार आहे. भाजीची तर्री कांदा आणि मसाले चांगले शिजण्यावर आहे.

हा चविष्ट पदार्थ अनेकांचा फेव्हरेट देखील आहे. डाळ कांद्याची भाजी घरगुती पद्धतीने बनवता येते. त्यामुळे तुम्ही देखील ही झणझणीत विदर्भ स्टाईल डाळ कांदा रेसिपी नक्की ट्राय करा.