Marathwada Weather Update: हिवाळ्यातही लागणार छत्री, थंडी गायब, पावसाची शक्यता, मराठवाड्यात कसं आहे हवामान?

राज्यासह मराठवाड्यात नोव्हेंबरमध्ये थंडीचा जोर वाढला होता. परंतु, डिसेंबरच्या पहिल्याच आठवड्यात हवामानात मोठे बदल जाणवत आहेत. थंडीची तीव्रता कमी झाली असून नव्या संकटाची शक्यता आहे.

मराठवाड्यातील सर्वच जिल्ह्यांत थंडीचा जोर कमी झाला आहे. आज हवामान ढगाळ राहणार असून काही ठिकाणी विजांसह हलक्या पावसाचा अंदाज आहे. 8 ते 10 डिसेंबरपर्यंत हवामानाची ही स्थिती कायम राहण्याची शक्यता आहे.

मराठवाड्यातील धाराशिव, लातूर या जिल्ह्यांमध्ये तुरळक ठिकाणी विजांसह हलक्या पावसाची शक्यता आहे. तर उर्वरित जिल्ह्यांत थंडीचा जोर ओसरला असून उष्णता वाढत आहे. परभणी, जालना या जिल्ह्यांत किमान तापमान 22 अंश सेल्सिअस एवढे असेल.

बीड आणि हिंगोली या जिल्हात किमान तापमान 21 अंश सेल्सिअस राहील. त्यासोबतच नांदेड जिल्ह्यामध्ये किमान तापमान हे 18 अंश सेल्सिअस असेल. छत्रपती संभाजीनगरमध्ये कमाल तापमान 30 अंश सेल्सिअस तर किमान तापमान 22 अंश सेल्सिअस इतके असणार आहे.

मराठवाड्यातील काही जिल्ह्यांमध्ये कोरडं आणि ढगाळ वातावरण राहणार असल्याने शेतकऱ्यांसाठी चिंतेती बाब आहे. रब्बी हंगामातील शेती पिकांना रोगांचा धोका निर्माण होण्याची शक्यता असून शेतकऱ्यांना योग्य ती काळजी घ्यावी लागेल.