महिलेचा पुरुषावर रेप ते नांदेडच्या सक्षम ताटे हत्या प्रकरणाचं पुढे काय झालं? नोव्हेंबरमधील गाजलेल्या घटना PHOTOS

बघता बघता २०२५ वर्ष संपायला आता अवघे ३१ दिवस उरले आहे. हे वर्ष अनेक घटनांनी गाजलं. अशातच नोव्हेंबर महिन्यात महाराष्ट्राला हादरावून सोडणाऱ्या काही घटना या दुर्दैवी आणि दु:खद अशाच होत्या. नवले पूल, ताम्हिणी घाटात थार अपघात आणि दोनच दिवसांपूर्वी नांदेडमध्ये प्रेमसंबंधाला विरोधात एका २५ वर्षीय तरुणाची निर्घृणपणे हत्या करण्यात आली. या आणि इतर प्रकरणाचं नेमकं पुढे काय झालं त्याचा हा आढावा...

नवले ब्रिज अपघात - ८ जणांचा मृत्यू - पुण्यातील नवले पुलावर पुणे -बंगळुरू महामार्गावर गुरुवार, १३ नोव्हेंबर २०२५ रोजी एका कंटेनरचा भीषण अपघात झाला. ब्रेक फेल झाल्यामुळे साताऱ्याहून मुंबईच्या दिशेने येणाऱ्या लेनवर एका भरधाव कंटेनरचा ब्रेकफेल झाला होता.

त्यामुळे त्याने एका कंटेनर आणि कारला भीषण धडक दिली होती. या धडकेनंतर स्फोट होऊन आग लागली होती. या आगीत होरपळून आता आठ जणांचा मृत्यू झाला होता. ज्यामध्ये चार पुरूष ,तीन महिला आणि सात वर्षांची मुलगी अशा आठ जणांचा समावेश होता. तसेच या अपघातात 20 जण गंभीररित्या जखमी झाली होती.

ताम्हिणी घाटात थार अपघात ६ जणांचा मृत्यू - पुण्यात राहणाऱ्या ६ तरुणांचा ताम्हिणी घाटामध्ये कार कोसळून मृत्यू झाला. एका नवीन थार गाडीसह कोकण भ्रमंतीसाठी निघालेल्या २१ ते २२ वयोगटातील सहा तरुणांचा या अपघातात दुर्दैवी मृत्यू झाला. हवेली तालुक्यातील कोंडवे धावडे गावातील हे सर्व तरुण आपल्या नवीन कोऱ्या थार गाडीतून कोकणात फिरायला निघाले होते,

पण मंगळवारी त्यांची ही कार घाटातील ५०० फूट खोल दरीत कोसळली आणि हा अपघात जीवघेणा ठरला. मृतांमध्ये 24 वर्षांचा साहिल गोठे याच्यासह शिवा माने (२०), प्रथम चव्हाण (२३), श्री कोळी (१९), ओमकार कोळी (२०) आणि पुनीत शेट्टी (२१) यांचा मृत्यू झाला. पण, गाडीवरील नियंत्रण सुटल्याने झालेल्या या अपघातात त्यांच्या सगळ्यांच्याच स्वप्नांचा करुण अंत झाला.

मालेगाव चिमुरडी हत्याकांड - नाशिक जिल्ह्यातील मालेगावमध्ये डोंगराळे गावात ४ वर्षांच्या चिमुरडीवर अत्याचार करून निर्घृणपणे खून करण्यात आला. मृत चिमुरडीच्या वडिलांशी भांडण झालं होतं. या भांडणाचा बदला घेण्यासाठी नराधम विजय खैरनार नावाच्या आरोपीनं हे कृत्य केलं. या प्रकरणात आरोपी विजय संजय खैरनार हा पोलिसांच्या कोठडीत आहे.

मालेगाव जिल्हा सत्र न्यायालयाने आरोपीला ११ दिवसांची पोलीस कोठडीत रवानगी केली. मागील ११ दिवसांपासून त्याला शहरातील वेगवेगळ्या पोलीस कोठडीत ठेवण्यात आलं आहे. या घटनेमुळे मालेगावसह राज्यात संतापाची लाट उसळली आहे. या प्रकरणाची आता सरकारी वकील म्हणून उज्ज्वल निकम यांची नियुक्त केली आहे.

पुरुषावर बलात्काराचा आरोप तर सांस्कृतिक राजधानी असलेल्या पुण्यात एका महिलेनं एका इसमावर अत्याचार केल्याचं प्रकरण समोर आलं आहे. या महिलेविरोधात गुन्हा दाखल करण्यात आला आहे. कोथरूड पोलीस स्टेशनच्या हद्दीत ही घटना घडली. गौरीमयी (नाव बदललंय) असं आरोपी महिलेचं नाव आहे. या महिलेनं एका पुरुषावर अत्याचार केला. गुंगीचं औषध देऊन कोल्हापूरच्या इसमावर अत्याचार केला होता, असा आरोपी पीडित इसमाने केला आहे. या प्रकरणी पीडित इसमाच्या तक्रारीवरून कोथरूड पोलीस स्टेशनमध्ये महिलेवर करण्यात आला गुन्हा दाखल केला आहे. या प्रकरणी आरोपी महिलेला पोलिसांनी नोटीस बजावली असून चौकशीला बोलावण्यात आलं आहे.

अनंत गर्जे यांच्या पत्नीची आत्महत्या तर नोव्हेंबर महिन्याच्या अखेरीस प्रकरण गाजलं ते भाजप नेत्या आणि राज्याच्या मंत्री पंकजा मुंडे यांचे पीए (PA) अनंत गर्जे यांच्या पत्नी डॉ. गौरी यांच्या आत्महत्या प्रकरणामुळे. अनंत गर्जे यांच्या पत्नीने राहत्या घरी गळफास घेतला. लग्नाला अवघे काही महिने झाले असतानाच हा प्रकार घडल्याने एकच खळबळ उडाली. अनंत गर्जे यांच्या सासरच्या मंडळींनी हत्येचा आरोप करत पोलिसांत धाव घेतली होती. या प्रकरणी पोलिसांनी एफआयआर दाखल केल्यानंतर अनंत गर्जे याला अटक केली. अनंत गर्जे सध्या पोलिसांच्या कोठडीत आहे.

सक्षम ताटे हत्या प्रकरण - नांदेडमध्ये प्रेमसंबधातून एका तरुणाची मुलीच्या बापाने आणि भावाने मिळून गोळ्या झाडून हत्या केली. बाप आणि भावाच्या या कृत्यानंतर मुलीने आपल्या प्रियकराच्या पार्थिवासोबत लग्न केलं. या घटनेमुळे महाराष्ट्रात खळबळ उडाली आहे. शहरातील जुन्या नांदेड परिसरातील मिलिंदनगर भागामध्ये गुरुवारी संध्याकाळी सक्षम ताटे (वय २५) या तरुणाची निर्घृणपणे हत्या करण्यात आली. सक्षमची प्रेयसी आंचल मामडीवार हिने त्याच्या पार्थिवाशी लग्न केलं.

सक्षम आणि आंचल मामीडवार या दोघांचे प्रेमसंबंध होते. त्यांच्या प्रेमसंबंधाला आरोपी वडील गजानन मामीडवार, दोन भाऊ हिमेश मामीडवार आणि साहिल मामीडवार विरोध होता. मृत सक्षम हा आंचलाचा भाऊ हिमेश आणि साहिल यांचा मित्र होता. पण, आपल्याच बहिणीसोबत प्रेमसंबंध असल्यामुळे दोघांना प्रचंड राग होता.

सक्षमला आंचलपासून दूर राहण्यास बजावण्यात आलं होतं. पण, गुरुवारी सक्षम आणि आंचलच्या वडील आणि भावाशी वाद झाला. त्यानंतर वाद हाणामारीवर गेलं. त्याच आरोपींनी सक्षमवर गोळ्या झाडल्या. एक गोळी ही सक्षमच्या बरगड्यात लागली होती. त्यानंतर फरशीने त्याच्या डोक्यात वार करून त्याला ठार मारण्यात आलं.

अचानक गायब झालेलं जोडपं कुठे सापडलं? मुळचे जळगावचे पण सध्या कामानिमित्त तेलंगणामध्ये असणारे पद्मसिंह पाटील त्यांच्या पत्नी नम्रतासह खाजगी कारने जळगावच्या दिशेने निघाले होते. त्याचा चुलत भाऊ संदीप पाटील याच्यासोबत त्यांच्या बोलणेही झाले होते.त्यानंतर संध्याकाळी पुन्हा संदीप पाटील यांनी सहा साडेसहा दरम्यान पद्मसिंह पाटील यांना कॉल केला होता.त्यावेळी त्यांनी रात्री दहापर्यंत जळगावमध्ये पोहोचू अशी माहिती दिली होती. पण दहा वाजून गेले तरी ते आले नव्हते. त्या दोघांचाही फोन लागत नव्हता म्हणून पाटील कुटुंबिय चिंतेत होते.

घटनेचा तपास सूरू असताना नेशनल हायवेवर पोलिसांना एक विहीर आढळून आली होती.या विहीरीत पद्मसिंह पाटील यांची कार पडली होती. त्यामुळे या विहीरीत पडून पद्मसिंह पाटील आणि त्यांची पत्नी नम्रता पाटील यांचा मृत्यू झाला होता.दरम्यान या घटनेनंतर पोलिसांनी क्रेनच्या मदतीने कार बाहेर काढून मृतदेह ताब्यात घेतले आहेत. तसेच या घटनेचा अधिक तपास सूरू केला आहे.