Maharashtra Weather Update: भंडारा, गोंदियात पारा घसरला, विदर्भात हुडहुडी, तुमच्या जिल्ह्यात काय स्थिती?

संपूर्ण राज्यात थंडीचा कडाका वाढत असून दिवसेंदिवस तापमानात घट होत आहे. विदर्भातील किमान तापमान 13 अंशांपर्यंत घसरलं असून  पुढील काही दिवस कडाक्याच्या थंडीचे असणार आहेत.

विदर्भात पुढील काही दिवस हवामान कोरडे आणि आकाश निरभ्र राहील. त्यामुळे विदर्भात कुठलीही पावसाची शक्यता नाही. मात्र, थंडीचा जोर आणखी वाढण्याची शक्यता हवामान विभागानं वर्तवली आहे. आज 22 नोव्हेंबरला विदर्भातील सर्वच जिल्ह्यातील वातावरण कोरडे राहून निरभ्र आकाश असणार आहे.

वाशिम, चंद्रपूर, अकोला या जिल्ह्यातील किमान तापमान हे 15 ते 16 अंश सेल्सिअस इतके असेल. गुरुवारी या जिल्ह्यातील तापमानात घट बघायला मिळाली होती. मात्र आज 22 नोव्हेंबरला किमान तापमानात वाढ झाली आहे. नागपूर, अमरावती, वर्धा, बुलढाणा, यवतमाळ, गडचिरोली या जिल्ह्यातील किमान तापमान हे 14 अंश सेल्सिअस इतके आहे.

विदर्भातील सर्वच जिल्ह्यांत तापमानात घट झाल्याने थंडीचा कडाका आणखी वाढलाय. गोंदिया, भंडारा या सर्व जिल्ह्यातील किमान तापमान 13 अंश सेल्सिअस इतके आहे. या जिल्ह्यातील तापमानात सर्वाधिक घट झाल्याचे दिसून येत आहे. त्यामुळे तेथील नागरिकांना आरोग्याची काळजी घ्यावी लागणार आहे.

विदर्भातील सर्वच जिल्ह्यांमध्ये तापमानात घट झाली आहे. त्यामुळे विदर्भात कडाक्याची थंडी जाणवत असून दुपारी उकाडा जाणवत आहे. विचित्र हवामान स्थितीमुळे शेतीवरही परिणाम होत असून शेतकऱ्यांना आपल्या पिकांची देखभाल करावी लागेल.