शेअर बाजारात सुरू झाला Offer For Sale, सरकारचा मोठा डाव; फक्त 54 रुपयांत ‘हॉट’ शेअर्स उपलब्ध

सरकारी बँक ऑफ महाराष्ट्रमध्ये केंद्र सरकारने आपली हिस्सेदारी विकण्यासाठी OFS (ऑफर फॉर सेल) प्रक्रिया सुरू केली आहे. मंगळवारी हा इश्यू फक्त मोठ्या गुंतवणूकदारांसाठी (नॉन-रिटेल) खुला होता आणि त्याला प्रचंड प्रतिसादही मिळाला. बेस साइजच्या तब्बल चार पट म्हणजे 400% या इश्यूची सब्स्क्रिप्शन झाली.

आज 3 डिसेंबरपासून OFS रिटेल गुंतवणूकदारांसाठी खुला झाला असून, बँकेचे परफॉर्मन्स उत्कृष्ट असल्यामुळे अनेक लहान गुंतवणूकदार हे शेअर्स कमी किमतीत खरेदी करण्याचा विचार करत आहेत. सरकारने ग्रीन शू ऑप्शनही वापरला आहे, म्हणजे जास्त मागणी असल्यास आणखी शेअर्स विकून अधिक निधी उभारला जाणार आहे.

जर तुम्ही सामान्य रिटेल गुंतवणूकदार असाल आणि बँक ऑफ महाराष्ट्रच्या OFS मध्ये सहभागी व्हायचे असेल, तर प्रक्रिया अगदी सोपी आहे. सुरुवातीला तुमचे ट्रेडिंग किंवा डीमॅट अकाउंट कोणत्याही ब्रोकरकडे (जसे की Zerodha, Angel, Upstox किंवा कोणताही बँक-ब्रोकर) उघडलेले असणे आवश्यक आहे. लॉगिन केल्यानंतर OFS / Corporate Action हा पर्याय निवडा आणि त्यात Bank of Maharashtra शोधून क्लिक करा.

त्यानंतर ‘Retails Category’ निवडणे आवश्यक आहे, कारण रिटेलसाठी खास असा हा दिवस खुला असतो. मग तुम्हाला किती शेअर्स आणि कोणत्या किमतीत घ्यायचे आहेत ते भरावे लागते. किंमत Floor Price म्हणजे किमान निश्चित किंमत किंवा त्यापेक्षा जास्त असू शकते, पण त्याखाली नाही. सर्व तपशील अचूक भरल्यानंतर बिड सबमिट करा. यासाठी तुमच्या ट्रेडिंग अकाउंटमध्ये आवश्यक तेवढी रक्कम आधीच असणे खूप महत्त्वाचे आहे, अन्यथा बिड रिजेक्ट होऊ शकते.

रिटेल गुंतवणूकदार अनेक बिड्सही लावू शकतात, म्हणजे वेगवेगळ्या किंमतींवर किंवा वेगवेगळ्या प्रमाणात. जितक्या बिड्स, तितकी अलॉटमेंटची शक्यता वाढते. दिवसभर तुम्ही बिड्स कितीही वेळा बदलू, कमी-जास्त करू शकता. जर OFS मध्ये जास्त बिड्स आल्या आणि ओव्हरसब्स्क्रिप्शन झाले, तर तुम्हाला मागितलेल्या शेअर्सपेक्षा कमी मिळू शकतात. उर्वरित रक्कम IPO प्रमाणेच आपोआप परत येते आणि ती रक्कम पुढच्या दिवशी वापरता येते.

सरकार या बँकेतली आपली हिस्सेदारी 5% पर्यंत विकण्याची योजना आखत आहे, ज्यामुळे बँक किमान सार्वजनिक भागभांडवलाच्या नियमांचे पालन करू शकेल. ग्रीन शू ऑप्शन वापरल्यामुळे, रिटेल गुंतवणूकदारांकडून प्रतिसाद चांगला मिळाला तर एकूण 6% हिस्सेदारी विकली जाईल. OFS नंतर सरकारची हिस्सेदारी 79.6% वरून 73.6% पर्यंत कमी होईल. OFS चे फ्लोर प्राइस 54 रुपये ठेवण्यात आले आहे.

2025 मध्ये या बँकेच्या शेअर्सने 10.5% वाढ नोंदवली आहे. मंगळवारी हे शेअर्स 57.61 रुपयांवर बंद झाले होते, तर आज (बुधवार) दुपारी 2:08 वाजता ते 1.93% घसरून 56.50 रुपयेवर ट्रेड करत होते. ही संपूर्ण प्रक्रिया व्यवस्थित समजून घेऊन आणि योग्य तपासणी करून रिटेल गुंतवणूकदार या OFS मध्ये सहज सहभागी होऊ शकतात.