काही मिनिटांत बुडाले 6,00,000,00,00,000 भारतातील कंपन्यांवरही मोठा परिणाम, तुमच्याकडे आहे का Share?

अमेरिकेतील तंत्रज्ञान क्षेत्रातील एक दिग्गज कंपनी असलेल्या ओरेकलने नुकतेच जाहीर केलेले तिमाही निकाल बाजाराच्या अपेक्षेनुसार नव्हते. परिणामी, कंपनीच्या शेअरमध्ये एका रात्रीत तब्बल ११% पर्यंतची मोठी घसरण झाली. या एका धक्क्याने ओरेकलचे काही तासांतच सुमारे सुमारे ५.९ ते ६.७ लाख कोटी रुपयांचं नुकसान झालं आहे. ज्यामुळे जागतिक बाजारात चिंतेचे वातावरण आहे.

ओरेकलने AI डील्समध्ये मोठी आघाडी घेतली असून, कंपनीचे भविष्यातील कॉन्ट्रॅक्ट्स ४३८% ने वाढून $५२३ अब्ज वर पोहोचले आहेत. ही वाढ चांगली असली तरी, वॉल स्ट्रीट कंपनीच्या महसुलात ज्या वेगाने वाढ होण्याची अपेक्षा करत होते, त्यात ओरेकल कमी पडली. कंपनीचा महसूल $१६.०६ अब्ज राहिला, जो बाजाराच्या $१६.२१ अब्जच्या अपेक्षेपेक्षा कमी होता.

सर्वात मोठी चिंता 'कोर बिझनेस'च्या कमाईबद्दल आहे. कंपनीच्या नफ्यात वाढ दिसत असली, तरी यात एका मालमत्तेच्या विक्रीतून मिळालेला एक-वेळचा फायदा जास्त आहे. याचा अर्थ, कंपनीच्या मुख्य व्यवसायातून झालेली खरी कमाई बाजाराला अपेक्षित तितकी दमदार नाही.

याशिवाय, कंपनी AI मध्ये मोठी गुंतवणूक करत आहे, ज्यामुळे तिच्यावर मोठा कर्जाचा बोजा वाढला आहे. कंपनी AI इन्फ्रास्ट्रक्चरसाठी स्वतःला जास्त कर्जात ढकलत आहे का, ही भीती गुंतवणूकदारांना सतावत आहे.

ओरेकल ही जागतिक स्तरावर मोठ्या कंपन्यांना तंत्रज्ञान सेवा देणारी कंपनी असल्याने, तिच्या खराब निकालांचा परिणाम भारताच्या आयटी क्षेत्रावरही होतो. ओरेकलसारख्या टॉप कंपनीमध्ये जेव्हा महसूल आणि अनिश्चिततेमुळे कमजोरी दिसते, तेव्हा त्याचा परिणाम जागतिक आयटी क्षेत्राच्या मानसिकतेवर पडतो.

त्यामुळे इन्फोसिस, टीसीएस, विप्रो आणि एचसीएल टेक सारख्या भारतीय आयटी कंपन्यांचे शेअर्स उद्घाटन सत्रात दबावाखाली येऊ शकतात, कारण त्यांची कमाई देखील जागतिक तंत्रज्ञान क्षेत्रातील खर्चावर अवलंबून असते.

थोडक्यात सांगायचे झाल्यास, गुंतवणूकदारांना आता केवळ भविष्यात चांगली वाढ दिसेल या आश्वासनावर विश्वास नाही, तर आता लगेच 'जास्त नफा' कमावून देणारी ग्रोथ हवी आहे. ओरेकल कंपनी हे सिद्ध करू न शकल्याने बाजारात मोठी अस्थिरता निर्माण झाली आहे.