Weather Alert : महाराष्ट्राला शनिवारी बसणार बर्फासारख्या लाटेचा तडाखा, हवामान खात्याकडून अलर्ट

गेल्या काही दिवसांत राज्यात थंडी कायम आहे. अनेक जिल्ह्यांत किमान तापमानाचा पारा घसरलाय. उत्तर महाराष्ट्र आणि पूर्व विदर्भात थंडी जास्त असल्याचं दिसून येतं आहे. जेऊर येथे 5 अंश सेल्सिअस तापमानाची नोंद झाली. पुढील काही दिवस राज्यात थंडीचा कडाका कायम राहणार असल्याची माहिती हवामान विभागानं दिली आहे.

20 डिसेंबर रोजीही राज्यात थंडीचा कडाका असणार आहे. पश्चिम महाराष्ट्र, उत्तर महाराष्ट्र, मराठवाडा आणि विदर्भात पारा 10 अंशाच्या खाली राहण्याची शक्यता आहे. पाहुयात, 20 डिसेंबर रोजी राज्यातील तापमान आणि हवामानाची स्थिती कशी राहील.

मुंबईत थंडीचा कडाका कमी आहे. मुंबईतील कमाल तापमान 33 अंश सेल्सिअस तर किमान तापमान 18 अंश सेल्सिअस इतकं असू शकतं. त्याठिकाणी निरभ्र आकाश राहण्याची शक्यता आहे. कोकण विभागात कमाल तापमान अधिक असल्याचे दिसून येत आहे.

पश्चिम महाराष्ट्रात देखील थंडीचा कहर सुरू आहे. प्रमुख शहर असलेल्या पुणे येथील कमाल तापमान 19 अंश सेल्सिअस तर किमान तापमान 9 अंश सेल्सिअस इतकं असू शकतं. पुण्यात दिवसभर धुकं पडण्याची शक्यता आहे. इतरही जिल्ह्यांत तापमानात घट दिसून येत आहे.

मराठवाड्यातही थंडी कायम आहे. प्रमुख शहर असलेल्या छत्रपती संभाजीनगर येथील कमाल तापमान 30 अंश सेल्सिअस तर किमान तापमान 11 अंश सेल्सिअस इतकं असू शकतं. त्याठिकाणी निरभ्र आकाश राहण्याची शक्यता आहे. मराठवाड्यातील इतरही जिल्ह्यांत सकाळी आणि रात्रीच्या वेळी थंडीचा कडाका कायम आहे. बीड जिल्ह्यांत 10 अंशाच्या खाली तापमानाची नोंद झाली आहे.

उत्तर महाराष्ट्रात तापमानाचा पारा चांगलाच घसरलाय. नाशिकमधील कमाल तापमान 30 अंश सेल्सिअस तर किमान तापमान 10 अंश सेल्सिअस इतकं असू शकतं. त्याठिकाणी निरभ्र आकाश राहण्याची शक्यता हवामान विभागानं वर्तवली आहे. अहिल्यानगर आणि नाशिक येथे 7 अंश सेल्सिअस तापमानाची नोंद झाली आहे. त्यामुळे नागरिकांनी सतर्कता बाळगणे गरजेचे आहे.

विदर्भातही हुडहुडी कायम आहे. प्रमुख शहर असलेल्या नागपूर येथील कमाल तापमान 29 अंश सेल्सिअस तर किमान तापमान 11 अंश सेल्सिअस इतकं असू शकतं. त्याठिकाणी मुख्यतः निरभ्र आकाश राहण्याची शक्यता आहे. अमरावती, गोंदिया, नागपूर येथे 10 अंशाच्या खाली तापमानाची नोंद झाली आहे. पुढील काही दिवस तापमानात घट कायम राहणार असल्याची माहिती हवामान विभागानं दिली आहे.