Weather Alert: पश्चिम महाराष्ट्रात पावसाचं धुमशान सुरूच, शनिवारी पुण्यासह 4 जिल्ह्यांना यलो अलर्ट

राज्याच्या काही भागांत जोरदार पाऊस कोसळत आहे. यातच कमाल तापमानात चढ-उतार सुरु आहेत. आज 20 सप्टेंबर रोजी पश्चिम महाराष्ट्रासह मराठवाडा, पूर्व विदर्भात तुरळक ठिकाणी विजांसह पावसाचा अंदाज आहे. हवामान विभागाने काही जिल्ह्यांना सतर्कतेचा इशारा दिला आहे. उर्वरित राज्यात मुख्यतः पावसाच्या उघडीपीसह हलक्या पावसाची शक्‍यता वर्तविण्यात आली आहे.

पुणे जिल्ह्यातील शिवाजीनगर परिसरात पावसाने थैमान घालते. मागील 24 तासात 97.4 मिलिमीटर पावसाची नोंद झाली. तसेच कमाल तापमानाचा पारा 28.4 अंश सेल्सिअस इतका राहिला. आज पुणे जिल्ह्यात आकाश ढगाळ राहिल. तसेच विजांसह जोरदार पावसाची शक्‍यता असल्याने सतर्कतेचा येलो अलर्ट आहे.

सातारा जिल्ह्यात गुरुवारी 3 मिलिमीटर पावसाची नोंद झाली. आज साताऱ्यातील कमाल तापमान 30 अंश सेल्सिअस राहिल. पुढील 24 तासात विजांच्या कडकडाटासह जोरदार पावसाची शक्यता आहे. यावेळी तीस ते चाळीस किलोमीटर प्रतितास वेगवान वाऱ्याची शक्यता आहे.

कोल्हापूर जिल्ह्यात मागील 24 तासात 34 मिलिमीटर पावसाची नोंद झाली. यावेळी कमाल तापमान 25.5 अंश सेल्सिअस राहिले. आज कोल्हापूर जिल्ह्यात कमाल तापमान 30 अंशावर राहिल. पुढील 24 तास कोल्हापूर जिल्ह्यात अंशत: ढगाळ वातावरण राहून एक दोन वेळा गडगडाटी पावसाची शक्यता हवामान विभागाने वर्तवली आहे.

सोलापूर जिल्हात मागील 24 तासात 5 मिलीमीटर पाऊस नोंदविण्यात आला. तसेच शुक्रवारी सोलापूर जिल्ह्यात 31.7 अंश सेल्सिअस तापमानाची नोंद झाली. पुढील 24 तासात कमाल तापमान 32 अंशावर राहिल. तसेच विजांसह पावसाची शक्यता असल्याने सतर्कतेचा यलो अलर्ट देण्यात आला आहे.

मागील 24 तासात सांगली जिल्ह्याच्या बहुतांश भागात पावसाची उघडीप राहिली. उन्हाच्या चटक्यासह तापमान 28.8 अंश सेल्सिअस नोंदविण्यात आले. आज शनिवारी सांगली जिल्ह्यात अंशतः ढगाळ आकाशासह एक दोन वेळा गडगडाटी पावसाची शक्यता हवामान विभागाकडून वर्तवण्यात आली आहे.

पुढील 24 तास राज्यात काही भागात पावसाचे वातावरण कायम आहे. पश्चिम महाराष्ट्रातील सोलापूर, सातारा, सांगली आणि पुणे जिल्ह्यांना 20 सप्टेंबर रोजी विजांसह पावसाची शक्यता असल्याने सतर्कतेचा यलो अलर्ट देण्यात आला आहे. या काळात नागरिकांनी योग्य ती काळजी घ्यावी, अशा सूचना हवामान विभागाने केल्या आहेत.