Weather Alert: महाराष्ट्रात पावसाचं होणार जोरदार कमबॅक, 23 जिल्ह्यांना यलो अलर्ट

हवामान विभागाने दिलेल्या अंदाजानुसार ऑगस्ट महिन्याच्या दुसऱ्या आठवड्यात राज्यातील सर्वच भागांत पावसाची शक्यता वर्तवण्यात आली आहे. कोकण, मध्य महाराष्ट्र, मराठवाडा आणि विदर्भातील जिल्ह्यांना पावसाचा यलो अलर्ट जारी करण्यात आला आहे. राज्यात वादळी वाऱ्यासह पावसाची शक्यता असली तरीही काही भागांत उन्हाचे चटके देखील नागरिकांना सोसावे लागत आहेत. ऊन आणि हलका पाऊस यामुळे दमट वातावरण निर्माण झाले आहे. पाहुयात 7 ऑगस्ट रोजी राज्यातील हवामानाची स्थिती कशी राहील.

कोकण विभागातील पालघर, ठाणे, मुंबई, रायगड या जिल्ह्यांत ढगांच्या गडगडाटासह हलक्या पावसाची शक्यता वर्तवण्यात आली आहे. तर रत्नागिरी, सिंधुदुर्ग या दोन जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता आहे. या दोन जिल्ह्यांना यलो अलर्ट जारी करण्यात आला आहे.

पुणे, पुणे घाटमाथा, कोल्हापूर घाटमाथा, कोल्हापूर, सातारा, सातारा घाटमाथा, सांगली, सोलापूर या सर्व जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता हवामान विभागानं वर्तवली आहे. पश्चिम महाराष्ट्रातील सर्वच जिल्ह्यांना यलो अलर्ट जारी करण्यात आला आहे.

मराठवाड्यातील छत्रपती संभाजीनगर आणि जालना या दोन जिल्ह्यांत ढगांच्या गडगडाटासह हलक्या ते मध्यम स्वरूपाच्या पावसाची शक्यता आहे. तसेच परभणी, बीड, हिंगोली, नांदेड, लातूर आणि धाराशिव या जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता वर्तवण्यात आली आहे. या 6 जिल्ह्यांना पावसाचा यलो अलर्ट जारी करण्यात आला आहे.

उत्तर महाराष्ट्रातील नाशिक, धुळे, नंदुरबार, जळगाव या जिल्ह्यांत हलक्या पावसाची शक्यता आहे. तर अहिल्यानगर जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता असल्याने पावसाचा यलो अलर्ट जारी करण्यात आला आहे.

विदर्भातील नागपूर, भंडारा, चंद्रपूर, गोंदिया, वर्धा आणि यवतमाळ या जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता आहे. या 6 जिल्ह्यांना पावसाचा यलो अलर्ट जारी करण्यात आला आहे. अकोला, अमरावती, बुलढाणा, गडचिरोली आणि वाशिम या जिल्ह्यांत कुठलीही पावसाची शक्यता नाही.

राज्यातील विविध भागांत वादळी वाऱ्यासह पावसाची शक्यता हवामान विभागानं वर्तवली आहे. राज्यातील 23 जिल्ह्यांना पावसाचा यलो अलर्ट जारी करण्यात आला आहे. त्यामुळे शेतकऱ्यांनी पिकांची काळजी घेणे आवश्यक आहे. तसेच वातावरणातील बदलामुळे आरोग्याच्या समस्या उद्भवण्याची शक्यता आहे, नागरिकांनी आरोग्याची काळजी घेणे देखील गरजेचे आहे.