Weather Alert: महाराष्ट्रावर शनिवारी अस्मानी संकट, 24 जिल्ह्यांना अलर्ट

भारतीय हवामान खात्याने 13 सप्टेंबर रोजी महाराष्ट्रातील विविध भागांत पावसाचा इशारा दिला आहे. कोकण, मध्य महाराष्ट्र, मराठवाडा आणि विदर्भ या सर्वच भागांत हवामानात बदल दिसून येणार आहे. काही ठिकाणी हलका ते मध्यम पाऊस तर काही जिल्ह्यांमध्ये मुसळधार ते अति मुसळधार पावसाची शक्यता वर्तवण्यात आली आहे. यामुळे शेतकरी, नागरिक आणि प्रवाशांनी काळजी घेण्याचे आवाहन हवामान खात्याकडून करण्यात आले आहे. पाहुयात 13 सप्टेंबर रोजी राज्यातील हवामानाची स्थिती कशी राहील.

कोकण आणि मुंबई परिसरातील पालघर, ठाणे आणि मुंबई येथे हलक्या ते मध्यम स्वरूपाच्या पावसाची शक्यता आहे. रायगड आणि रत्नागिरी जिल्ह्यात मध्यम स्वरूपाच्या पावसाची शक्यता आहे. तर सिंधुदुर्ग जिल्ह्यात मुसळधार पावसाचा इशारा देण्यात आला असून, येथे यलो अलर्ट जारी केला आहे.

पश्चिम महाराष्ट्रातील पुणे, कोल्हापूर घाटमाथा, सातारा घाटमाथा तसेच सांगली आणि सोलापूर या जिल्ह्यांत वादळी वाऱ्यासह आणि विजांच्या कडकडाटासह पाऊस होण्याची शक्यता आहे. हवामान खात्याने या भागात यलो अलर्ट दिला आहे. तर पुणे घाटमाथा परिसरात मध्यम स्वरूपाच्या पावसाची शक्यता वर्तवली आहे.

मराठवाड्यातील छत्रपती संभाजीनगर आणि जालना जिल्ह्यांत हलका ते मध्यम स्वरूपाचा पाऊस होण्याची शक्यता आहे. परभणी, बीड, हिंगोली आणि धाराशिव जिल्ह्यांत विजांच्या कडकडाटासह वादळी वाऱ्यांसह पावसाची शक्यता वर्तवण्यात आली आहे. त्यामुळे यलो अलर्ट जारी करण्यात आला आहे. तर नांदेड आणि लातूर जिल्ह्यांत मुसळधार ते अति मुसळधार पावसाचा अंदाज देण्यात आला असून, येथे ऑरेंज अलर्ट जारी केला आहे.

उत्तर महाराष्ट्रातील धुळे, नंदुरबार, जळगाव आणि नाशिक जिल्ह्यांत हलका ते मध्यम पाऊस होण्याची शक्यता आहे. नाशिक घाटमाथा भागातही अशीच स्थिती राहील. अहिल्यानगर जिल्ह्यात वादळी वाऱ्यासह आणि विजांच्या कडकडाटासह पावसाची शक्यता असून, येथे यलो अलर्ट देण्यात आला आहे.

विदर्भातील अकोला, अमरावती, भंडारा, बुलढाणा आणि नागपूर जिल्ह्यांत वादळी वाऱ्यासह आणि विजांच्या कडकडाटासह पाऊस होण्याची शक्यता आहे. तर चंद्रपूर, गडचिरोली, गोंदिया, वर्धा, वाशिम आणि यवतमाळ या जिल्ह्यांत विजांच्या कडकडाटासह मुसळधार पावसाचा इशारा देण्यात आला आहे. विदर्भातील सर्वच जिल्ह्यांना पावसाचा यलो अलर्ट जारी करण्यात आला आहे.

13 सप्टेंबर रोजी राज्यात पावसाचा जोर कायम राहणार असून, काही ठिकाणी हलक्या सरी तर काही भागांत मुसळधार पाऊस अपेक्षित आहे. विशेषत: कोकण, मराठवाडा आणि विदर्भातील काही जिल्ह्यांत हवामान खात्याने अलर्ट दिला असल्यामुळे नागरिकांनी सतर्क राहणे आवश्यक आहे.