Weather Forecast: पुणे ते कोल्हापूर पुन्हा मुसळधार, 24 तास झोपडणार, हवामान विभागाकडून हायअलर्ट

पश्चिम महाराष्ट्रातील घाटमाथ्यावर पावसाचा जोर कायम आहे. आज 26 जून रोजी कोकण आणि घाटमाथ्यावर जोरदार पावसाचा इशारा दिला आहे. पश्चिम महाराष्ट्रातील सर्वच जिल्ह्यांत हलक्या पावसाचा अंदाज असून पुणे, सातारा आणि कोल्हापूर घाटमाथ्यावर मुसळधार पावसाचामुळे ऑरेंज अलर्ट देण्यात आला आहे.

पुणे जिल्ह्यामध्ये पावसाचा जोर कमी झाला आहे. मागील 24 तासात शिवाजीनगर परिसरात 0.9 मिलीमीटर पावसाची नोंद झाली. तसेच 28.5 अंश सेल्सिअस कमाल तापमान राहिले. पुणे जिल्ह्याच्या घाटमाथ्यावर मात्र जोरदार पावसाची शक्यता असल्याने दक्षतेचा ऑरेंज अलर्ट हवामान विभागाने दिला आहे.

कोल्हापूर परिसरात 21 मिलीमीटर पावसाची नोंद झाली. पुढील 24 तासात कमाल तापमान 26 अंश सेल्सिअस तर किमान तापमान 23 अंश सेल्सिअस असेल. मध्यम पावसासह आकाश ढगाळ राहील. कोल्हापूरच्या घाटमाथ्यावर जोरदार पावसाची शक्यता असल्याने ऑरेंज अलर्ट कायम आहे.

सातारा शहरात बुधवारी 10 मिलीमीटर पाऊस नोंदविण्यात आला. कमाल तापमान 27.3 अंश सेल्सिअस राहिले. पुढील 24 तासात कमाल तापमान 28 अंशावर राहील. पुढील 24 तासांसाठी ढगाळ आकाशासह हलक्या पावसाचा अंदाज भारतीय हवामान विभागाने दिला आहे. सातारा जिल्ह्याच्या घाटमाथ्यावर जोरदार पावसाची शक्यता असल्याने सतर्कतेचा ऑरेंज अलर्ट जारी केला आहे.

सोलापूर जिल्ह्यातील कमाल तापमान 32.2 अंशापर्यंत वाढले. रिमझिम पाऊस असून 3 मिलिमीटर पावसाची नोंद झाली. पुढील 24 तासात हलक्या पावसाची शक्यता आहे. यावेळी पारा 33 अंशांवर जाण्याचा अंदाज आहे.

सांगली जिल्ह्यात मागील 24 तासात 11 मिलिमीटर पावसाची नोंद झाली. जिल्ह्यातील वाळवा आणि शिराळा परिसरात पावसाची संततधार सुरू आहे. आज देखील सांगली जिल्ह्यात हलक्या पावसाचा अंदाज आहे. यावेळी जिल्ह्यातील कमाल तापमान 31 तर किमान तापमान 23 अंश सेल्सिअस इतके राहील.

पंजाबपासून उत्तर बांग्लादेशपर्यंत, तसेच अरबी समुद्रापासून झारखंडपर्यंत हवेचे कमी दाबाचे पट्टे सक्रिय आहेत. यामुळे कोकण, घाटमाथ्यावर पावसाचा जोर असून अतिवृष्टी होत आहे. त्यामुळे या भागातील नागरिकांना काळजी घ्यावी लागेल.