Weather Alert: पश्चिम महाराष्ट्रावर काळे ढग, सोलापूर ते पुणे झोडपणार, आज 5 जिल्ह्यांना सतर्कतेचा इशारा

राज्यात विजा, मेघगर्जनेसह पावसाचा धुमाकूळ सुरू आहे. अशातच राज्याच्या कमाल तापमानातील वाढ देखील कायम आहे. आज 23 सप्टेंबर रोजी कोकण, मराठवाड्यासह पश्चिम महाराष्ट्रात तुरळक ठिकाणी जोरदार सरी आणि विजांसह पावसाचा अंदाज आहे. हवामान विभागाने पुढील 24 तासांसाठी सतर्कतेचा इशारा दिला आहे. पश्चिम महाराष्ट्रातील हवामान अंदाज जाणून घेऊ.

पुण्यात सोमवारी पावसाचा जोर काहीसा कमी राहिला. तर कमाल तापमानाचा पारा 27.2 अंश सेल्सिअस इतका राहिला. आज पुणे जिल्ह्यात आकाश ढगाळ राहिल. तसेच विजांसह जोरदार पावसाची शक्‍यता असल्याने सतर्कतेचा यलो अलर्ट जारी केला आहे.

सातारा जिल्ह्यात सोमवारी 1 मिलिमीटर पावसाची नोंद झाली. आज कमाल तापमान 29 अंश सेल्सिअस राहील. पुढील 24 तासात विजांच्या कडकडाटासह जोरदार पावसाची शक्यता आहे. यावेळी 30 ते 40 किलोमीटर प्रतितास वेगवान वाऱ्याची शक्यता हवामान विभागाने वर्तवली आहे. साताऱ्यास विजांसह वादळी पावसाचा यलो अलर्ट दिला आहे.

कोल्हापूर जिल्ह्यात मागील 24 तासात उघडीप राहिली. यावेळी कमाल तापमान 26.7 अंश सेल्सिअस राहिले. आज कोल्हापूर जिल्ह्यात कमाल तापमान 29 अंशावर राहिल. पुढील 24 तास कोल्हापूर जिल्ह्यात अंशत: ढगाळ वातावरण राहून गडगडाटी पावसाची शक्यता हवामान विभागाने वर्तवली आहे. तसेच विजांच्या कडकडाटासह ताशी 30 ते 40 किलोमीटर वेगवान वाऱ्याची शक्यता असल्याने सतर्कतेचा यलो अलर्ट देण्यात आला आहे.

सोलापूर जिल्हात मागील 24 तासात 15 मिलीमीटर पाऊस नोंदविण्यात आला. तसेच सोमवारी सोलापूर जिल्ह्यात 31 अंश सेल्सिअस तापमानाची नोंद झाली. पुढील 24 तासात कमाल तापमान 31 अंशावर राहिल. तसेच विजांसह पावसाची शक्यता असल्याने सतर्कतेचा अलर्ट देण्यात आला आहे.

मागील 24 तासात सांगली शहर परिसरात 2 मिलीमीटर पावसाची नोंद झाली. तसेच जत परिसरामध्ये जोरदार पाऊस कोसळला. ढगाळ आकाशासह तापमान 27.3 अंश सेल्सिअस नोंदविण्यात आले. आज मंगळवारी सांगली जिल्ह्यात विजांच्या कडकडाटासह पावसाची शक्यता वर्तवण्यात आली आहे.

पुढील 24 तास राज्यात काही भागात पावसाचे वातावरण कायम आहे. पश्चिम महाराष्ट्रातील पाचही जिल्ह्यांना दिनांक 23 सप्टेंबर रोजी विजांसह पावसाची शक्यता असल्याने सतर्कतेचा यलो अलर्ट देण्यात आला आहे. त्यामुळे नागरिकांना योग्य ती काळजी घ्यावी लागेल.