Weather Alert: पश्चिम महाराष्ट्रात वारं फिरलं, पुन्हा धो धो कोसळणार, सोलापूर, सांगलीसह 4 जिल्ह्यांना अलर्ट

महाराष्ट्रात मान्सूनच्या परतीसाठी पोषक हवामान होत आहे. आज 8 ऑक्टोबर रोजी पूर्व विदर्भात विजांसह पावसाचा अंदाज आहे. तर उत्तर कोकण, उत्तर मराठवाडा, पूर्व तुरळक ठिकाणी विजांसह पावसाच्या सरींची शक्यता हवामान विभागाने वर्तवली आहे. पश्चिम महाराष्ट्रातील हवामान अंदाज जाणून घेऊ.

पुणे जिल्ह्यात मंगळवारी पावसाची उघडीप राहिली. यावेळी 30.7 अंश सेल्सिअस कमाल तापमान राहिले. आज पुणे जिल्ह्यासह घाटमाथ्यावर तुरळक ठिकाणी ढगाळ आकाश आणि विजांसह हलक्या पावसाची शक्‍यता आहे.

मागील 24 तासात सातारा जिल्ह्यातील कमाल तापमान 30.7 अंश सेल्सिअस इतके राहीले. यावेळी कराड परिसरात हलका पाऊस झाला. आज संपूर्ण साताऱ्यासह सातारा घाटमाथ्यावर ढगाळ आकाश आणि विजांसह पावसाची शक्‍यता असल्याने सतर्कतेचा येल अलर्ट देण्यात आला आहे. तसेच 30 ते 40 किलोमीटर प्रतितास वेगवान वाऱ्याची शक्यता आहे.

कोल्हापूर जिल्ह्यात मंगळवारी पावसाची उघडीप राहिली. पुढील 24 तासात कोल्हापूरसह घाटमाथ्यावर गडगडाटी वादळासह मध्यम पावसाची शक्यता आहे. विजांसह पावसाची शक्यता असल्याने हवामान विभागाकडून सतर्कतेचा यलो अलर्ट देण्यात आला आहे.

सोलापूर जिल्ह्यात मागील 24 तासात पावसाची उघडीप राहिली. यावेळी 33.3 अंश सेल्सिअस कमाल तापमानाची नोंद झाली. आज सोलापूर जिल्ह्यात विजांसह पावससाचा यलो अलर्ट हवामान विभागाने दिला आहे.

सांगली जिल्ह्यात मागील 24 तासात पावसाची उघडीप राहिली. यावेळी कमाल तापमान 30.8 अंश सेल्सिअस इतके राहिले. पुढील 24 तासात जिल्ह्यात विजांसह पावसाची शक्यता असल्याने सतर्कतेचा यलो अलर्ट देण्यात आला आहे.

पश्चिम महाराष्ट्रातील पाचही जिल्ह्यांत पुन्हा पावसाचे वातावरण तयार झाले आहे. आज पुणे वगळता सोलापूर, सांगली, सातारा आणि कोल्हापूर या चारही जिल्ह्यांना पावसाचा यलो अलर्ट जारी करण्यात आला आहे. त्यामुळे नागरिकांना योग्य ती काळजी घ्यावी लागेल. पुढील 3 दिवस हवामानाची हीच स्थिती कायम राहील.