Weather Alert: पश्चिम महाराष्ट्रात वारं फिरलं, आज वादळी पावसानं घेरलं, पुणे ते कोल्हापूर यलो अलर्ट

महाराष्ट्राच्या बहुतांश भागातून मान्सून परतला आहे. राज्यात उन्हाचा चटका कायम असताना पावसासाठी पोषक हवामान आहे. आज 15 ऑक्टोबर रोजी कोकण, मध्य महाराष्ट्र, मराठवाडा आणि विदर्भात विजांसह पावसाची शक्यता असल्याने हवामान विभागाने सतर्कतेचा इशारा दिला आहे. उर्वरित राज्यात उन्हाचा चटका कायम राहण्याची शक्यता आहे.

पुणे जिल्ह्यात मंगळवारी 32.5 अंश सेल्सिअस कमाल तापमानाची नोंद झाली. आज पुण्यात विजांसह पावसाची शक्यता हवामान विभागाने वर्तवली आहे. यावेळी कमाल तापमानाचा पारा 32 अंशावर राहणार असून पुढील 24 तासांसाठी हवामान विभागाने यलो अलर्ट जारी केला आहे.

मागील 24 तासात सातारा जिल्ह्यातील कमाल तापमान 31.9 अंश सेल्सिअस इतके राहिले. आज संपूर्ण साताऱ्यासह घाटमाथ्यावर विजांसह पावसाची शक्यता असल्याने हवामान विभागाने सतर्कतेचा यलो अलर्ट जारी केला आहे. आज पारा 32 अंशावर राहण्याचा अंदाज आहे.

कोल्हापूर जिल्ह्यात मंगळवारी 32.7 अंश सेल्सिअस तापमानाची नोंद झाली. पुढील 24 तासात कोल्हापूरसह घाटमाथ्यावर विजांसह पावसाची शक्यता आहे. यामुळे हवामान विभागाने सतर्कतेचा इशारा दिला आहे. यावेळी तापमान 32 अंश सेल्सिअस इतके राहील.

मंगळवारी सोलापूर जिल्ह्यात 34.3 अंश सेल्सिअस कमाल तापमानाची नोंद झाली. आज सोलापूर जिल्ह्यात विजांसह पावसाची शक्यता आहे. यावेळी कमाल तापमान 34 अंश सेल्सिअस इतके राहिल. पुढील 24 तासासाठी सोलापूर जिल्ह्यात सतर्कतेचा यलो अलर्ट देण्यात आला आहे.

सांगली जिल्ह्यात मागील 24 तासात 32.9 अंश सेल्सिअस तापमानाची नोंद झाली. बुधवारी जिल्ह्यात विजांसह पावसाची शक्यता असून हवामान विभागाने 24 तासांसाठी सतर्कतेचा इशारा दिला आहे. यावेळी पारा 32 अंशावर राहण्याचा अंदाज हवामान विभागाकडून वर्तवण्यात आला आहे.

आज संपूर्ण पश्चिम महाराष्ट्रात विजांसह पावसाची शक्यता असल्याने सतर्कतेचा इशारा देण्यात आला आहे. तसेच उर्वरित राज्यात तुरळक ठिकाणी विजांसह पावसाचा अंदाज वर्तवण्यात आला आहे. बहुतांश ठिकाणी कमाल तापमानाचा पारा 32 अंशापार आहे. उन्हाचा चटका अधिक तापदायक ठरत असून, दुपारच्या वेळी घराबाहेर पडणे त्रासदायक ठरत आहे.