Pune Rain: विजा कडाडणार, पाऊस कोसळणार, पुणे ते कोल्हापूर 24 तास अलर्ट, आजचा हवामान अंदाज

Pune Rain Alert: राज्यासह पश्चिम महाराष्ट्रात पावसाचा जोर वाढला असून आज कोल्हापूर ते पुणे घाट भागात ऑरेंज अलर्ट देण्यात आला आहे. राज्यात कोकण, घाटमाथा, मध्य महाराष्ट्रसह विविध ठिकाणी पावसाचा जोर कायम आहे. आज 15 जून रोजी पश्चिम महाराष्ट्रातील सर्वच जिल्ह्यांत पावसाची शक्यता आहे. वादळी वारा आणि विजाच्या कडकाडाटासह 24 तास जोरदार पावसाची शक्यता असल्याने हवामान विभागाने पुणे ते कोल्हापूर घाट भागासाठी ऑरेंज अलर्ट दिला आहे.

.पुणे जिल्ह्यात मागील 24 तासात 33.3 अंश सेल्सिअस कमाल तापमानाची नोंद झाली. पुण्यामध्ये पावसाने उघडीत घेतली असली तरीही पुणे घाटमाथ्यावर पावसाची शक्यता आहे. आज जोरदार पावसाची शक्यता असल्याने पुणे घाटमाथ्यास दक्षतेचा ऑरेंज अलर्ट जारी करण्यात आला आहे.

साताऱ्यातील पारा 29.3 अंश सेल्सिअसवर राहिला. तसेच मागील 24 तासात 23 मिलीमीटर पावसाची नोंद झाली. पुढील 24 तासात सातारा जिल्ह्यातील कमाल तापमान 32 अंशावर राहिल. जोरदार पावसाची शक्यता असल्याने सातारा घाटमाथ्यास सतर्कतेचा ऑरेंज अलर्ट आणि सातारा परिसरास मध्यम पावसाचा यलो अलर्ट हवामान विभागाकडून देण्यात आला आहे.

मागील 24 तासात कोल्हापूर परिसरात 0.2 मिलीमीटर पावसाची नोंद झाली. पुढील 24 तास कोल्हापूरच्या घाटमाथ्यावर जोरदार पावसाची शक्यता आहे. यावेळी कमाल तापमान 30 अंश सेल्सिअस तर किमान तापमान 23 अंश सेल्सिअस वर असेल. जोरदार वादळी पावसाची शक्यता असल्याने भारतीय हवामान विभागाने कोल्हापूरच्या घाटमाथ्यास दक्षतेचा ऑरेंज अलर्ट दिला आहे. तसेच कोल्हापूर परिसरात हलका पाऊस पडेल.

सांगली जिल्ह्यात गेल्या 24 तासांत 11 मिलिमीटर पावसाची नोंद झाली. पुढील 24 तासात सांगली जिल्ह्यात वाऱ्यासह एक- दोन वेळा जोरदार पावसाचा अंदाज आहे. यावेळी जिल्ह्यातील कमाल तापमान 31 तर किमान तापमान 23 अंश सेल्सिअस इतके राहील.

पुढील 24 तासात सोलापूर जिल्ह्यातील कमाल तापमान 32.6 अंशावर राहील. ढगाळ आकाशासह हलक्या पावसाचा अंदाज भारतीय हवामान विभागाने वर्तवला आहे.

राजस्थान आणि परिसरावर चक्राकार वारे वाहत असून, त्यापासून गुजरात ते उत्तर मध्य महाराष्ट्रापर्यंत हवेचा कमी दाबाचा पट्टा सक्रिय आहे. उत्तर कर्नाटक, मराठवाडा परिसरावर चक्राकार वाऱ्यांची स्थिती आहे. अरबी समुद्रापासून आंध्र प्रदेशाच्या किनाऱ्यापर्यंत हवेचा कमी दाबाचा पट्टा कायम आहे. या प्रणाली पूरक ठरत असल्याने राज्यात पावसाला सुरुवात झाली आहे.