Weather Alert: पुणे ते कोल्हापूर पुन्हा हवापालट, 15 ऑगस्टला मुसळधार पाऊस, 3 जिल्ह्यांना अलर्ट

राज्यातील काही भागांत मुसळधार पाऊस झालाय तर काही भागांत अजूनही उन्हाच्या झळांनी नागरिक त्रस्त आहेत. पश्चिम महाराष्ट्रातही पावसाची शक्यता हवामान विभागाकडून वर्तवण्यात येत आहे. 15 ऑगस्ट रोजीही पश्चिम महाराष्ट्रातील घाटमाथा परिसरात मुसळधार पावसाची शक्यता वर्तवण्यात आली आहे. तसेच तीन जिल्ह्यांत पावसाचा यलो अलर्ट जारी करण्यात आला आहे.

पश्चिम महाराष्ट्रातील प्रमुख शहर असलेल्या पुणे शहरात सामान्यतः ढगाळ आकाश राहून मध्यम स्वरूपाच्या पावसाची शक्यता वर्तवण्यात आली आहे. त्याठिकाणी कोणताही सतर्कतेचा अलर्ट जारी करण्यात आलेला नाही. आज 22 अंश सेल्सिअस ते 30 अंश सेल्सिअस दरम्यान तापमान राहण्याची शक्यता आहे. पुणे घाटमाथा परिसरात मुसळधार पावसाची शक्यता असून हवामान विभागाने पावसाचा यलो अलर्ट जारी केला आहे.

कोल्हापूरमध्ये अंशतः ढगाळ वातावरण राहून हलक्या ते मध्यम स्वरूपाच्या पावसाची शक्यता आहे. तेथील तापमान 21 ते 27 अंश सेल्सिअस दरम्यान राहण्याची शक्यता आहे. कोल्हापूर घाटमाथा परिसरात मुसळधार पावसाची शक्यता हवामान विभागानं वर्तवली आहे. त्यामुळे यलो अलर्ट जारी करण्यात आला आहे. नागरिकांनी सतर्कता बाळगण्याचे आवाहन प्रशासनाकडून करण्यात आले आहे.

सोलापूरमध्येही स्वातंत्र्यदिनी अंशतः ढगाळ आकाश राहून ढगांच्या गडगडाटासह हलक्या ते मध्यम स्वरूपाच्या पावसाची शक्यता आहे. तापमान 22 अंश सेल्सिअस ते 29 अंश सेल्सिअस दरम्यान राहण्याची शक्यता आहे. हलक्या पावसाची शक्यता असल्याने कुठलाही अलर्ट जारी करण्यात आलेला नाही.

सातारा जिल्ह्यातही सामान्यतः ढगाळ वातावरण राहून मध्यम स्वरूपाच्या पावसाची शक्यता आहे. तेथील तापमान 22 ते 28 अंश सेल्सिअस दरम्यान राहण्याची शक्यता आहे. सातारा घाटमाथा परिसरात मुसळधार पावसाची शक्यता वर्तवण्यात आली असून पावसाचा यलो अलर्ट देण्यात आला आहे.

सांगली जिल्ह्यातही सामान्यतः ढगाळ वातावरण राहून हलक्या ते मध्यम स्वरूपाच्या पावसाची शक्यता आहे. तेथील तापमान 22 ते 26 अंश सेल्सिअस दरम्यान राहील. सांगलीसाठी आज कुठलाही अलर्ट जारी करण्यात आलेला नाही.

पश्चिम महाराष्ट्रातील घाटमाथा परिसरात मुसळधार पावसाची शक्यता वर्तवण्यात आली आहे. पुढील तीन दिवस पावसाचा जोर कायम राहणार आहे. त्यामुळे घाटमाथा परिसरातील नागरिकांनी सतर्कता बाळगणे गरजेचे आहे. इतरही नागरिकांनी त्याभागातून प्रवास टाळावा, असे आवाहन प्रशासनाकडून करण्यात आले आहे.