Diwali 2025: यंदा 20 की 21 ऑक्टोबर... नेमकी दिवाळी कधी? पुण्यातील ज्योतिषांनी दिली संपूर्ण माहिती, धनत्रयोदशी ते भाऊबीज अचूक तारखा!

हिंदू धर्मातील सर्वात महत्त्वाचा मानला जाणारा दिवाळी हा सण अवघ्या काही दिवसांवर आला आहे. दिवाळीत लक्ष्मीपूजन, भाऊबीज आणि पाडवा या सणांना खास महत्त्व असतं. यंदा म्हणजेच 2025 च्या दिवाळीत हे सण नेमके कोणत्या दिवशी साजरे होणार आहेत? आणि यंदाची दिवाळी नेमकी कधी आहे? याबाबत अनेकांच्या मनात संभ्रम आहे. याबाबत पुण्यातील पुजारी अशोक पाटील यांनी माहिती दिलीये.

हिंदू पंचांगानुसार कार्तिक महिन्यातील अमावस्येला दिवाळीचा सण साजरा केला जातो. यंदा कार्तिक अमावस्या 20 ऑक्टोबर रोजी दुपारी 3:44 वाजता सुरू होऊन 21 ऑक्टोबर रोजी सायंकाळी 5:54 वाजेपर्यंत आहे. लक्ष्मीपूजनाची वेळ सूर्यास्तानंतरची असल्याने, या वर्षी दिवाळीचा मुख्य सण 20 ऑक्टोबरला साजरा केला जाईल.

धनत्रयोदशी (18 ऑक्टोबर 2025): दिवाळीतील पहिला दिवस म्हणजे धनत्रयोदशी होय. या दिवशी मुख्यतः खरेदी करणे आणि लक्ष्मी-कुबेर पूजेला विशेष महत्त्व आहे. घरात सोने, चांदी किंवा नवीन वस्तू खरेदी केल्यास संपत्ती आणि समृद्धी वाढते असे मानले जाते. यंदा खरेदीसाठी शुभ वेळ दुपारी 12:18 पासून 19 ऑक्टोबर रोजी दुपारी 1:51 पर्यंत आहे.

नरक चतुर्दशी (19 ऑक्टोबर 2025) धनत्रयोदशीनंतर नरक चतुर्दशीचा दिवस असतो. या दिवसाचं महत्त्व म्हणजे, या दिवशी भगवान श्रीकृष्णाने नरकासूर राक्षसाचा वध केला. त्यानंतर तेलाने स्नान करून आपला विजय साजरा केला. याच परंपरेनुसार, नरक चतुर्दशीला पहाटे अभ्यंगस्नान करण्याची प्रथा आहे.

लक्ष्मीपूजन (20 ऑक्टोबर 2025) दिवाळीचा मुख्य दिवस म्हणजे लक्ष्मीपूजन यावर्षी अमावस्या 20 ऑक्टोबरला सुरू होऊन 21 ऑक्टोबरपर्यंत आहे. सूर्यास्तानंतर लक्ष्मीपूजन होत असल्याने दिवाळी 20 ऑक्टोबर म्हणजेच, सोमवारी साजरी केली जाईल. लक्ष्मीपूजनाचा शुभ मुहूर्त संध्याकाळी 7:08 ते 8:18 पर्यंत आहे.

बालिप्रतिपदा / दिवाळी पाडवा (22 ऑक्टोबर 2025) दिवाळी पाडवा नवविवाहित जोडप्यांसाठी विशेष महत्त्वाचा दिवस आहे. या दिवशी राजा बलि यांची पूजा करून पाडवा साजरा केला जातो. नवविवाहित वधु-वरांसाठी हा दिवस महत्त्वाचा मानला जातो.

भाऊबीज (23 ऑक्टोबर 2025) दिवाळीचा शेवटचा आणि भावा बहिणीच्या पवित्र नात्याचा उत्सव म्हणजेच भाऊबीज होय. या दिवशी बहिण भावाला ओवाळते आणि भावाच्या सुख समृद्धीसाठी प्रार्थना करते. तर भाऊ बहिणीला भेटवस्तू देतो आणि तिचे रक्षण करण्याचं वचन देतो