अखेर प्रतीक्षा संपली! किंक्रांत टळली, उद्यापासून शुभं कार्यांना सुरुवात; पाहा तारखा आणि मुहूर्त

मकर संक्रांतीचा उत्साह आणि त्यानंतरचा 'किंक्रांत' किंवा 'करी' नावाचा अशुभ काळ आता संपला आहे. हिंदू पंचांगानुसार, संक्रांतीचा दुसरा दिवस म्हणजेच 15 जानेवारी 2026 हा करिदिन म्हणून पाळला गेला, ज्यामध्ये शुभ कार्ये वर्ज्य होती. मात्र, आता हा अडथळा दूर झाला असून उद्या, 16 जानेवारी 2026 पासून मंगल कार्यांचे सनई-चौघडे वाजायला सुरुवात होणार आहे. 2026 हे वर्ष विवाहासाठी आणि गृहप्रवेशासाठी अत्यंत शुभ मानले जात आहे. मात्र, जानेवारी महिन्यात 'शुक्र अस्ता'मुळे मोठ्या प्रमाणावर लग्नाचे मुहूर्त नसले, तरी इतर अनेक शुभ कार्यांसाठी मुहूर्त खुले झाले आहेत.

16 जानेवारी: उद्या 16 जानेवारी रोजी अतिशय शुभ योग जुळून आला आहे. ज्यांना नवीन व्यवसाय किंवा कामाचे नियोजन करायचे आहे, त्यांच्यासाठी हा 'सिद्धी योग' देणारा दिवस ठरेल.

गृहप्रवेश आणि वास्तू शांती: जानेवारीच्या शेवटच्या आठवड्यात 26, 28 आणि 29 जानेवारी रोजी वास्तुशांतीसाठी मध्यम मुहूर्त आहेत. मात्र, मोठ्या प्रमाणावर गृहप्रवेशासाठी फेब्रुवारीमधील 6, 11, 19 आणि 21 या तारखा उत्तम आहेत.

वाहन आणि मालमत्ता खरेदी: नवीन वाहन खरेदी करण्यासाठी 21, 28 आणि 29 जानेवारी हे दिवस अत्यंत शुभ आहेत. मकर राशीतील ग्रहांची स्थिती वाहन खरेदीसाठी पोषक मानली जात आहे.

साखरपुडा आणि मुंज: फेब्रुवारीच्या पहिल्या आठवड्यापासून मुंज आणि साखरपुड्याचे मुहूर्त मोठ्या प्रमाणात उपलब्ध आहेत. विशेषतः वसंत पंचमीच्या मुहूर्तावर अनेक उपनयन संस्कार पार पडतील.

व्यवसाय प्रारंभ: उद्यापासून कोणत्याही नवीन व्यवसायाची मुहूर्तमेढ रोवण्यासाठी दिवस अनुकूल आहेत. विशेषतः 31 जानेवारी रोजी होणारे बुधाचे राशी परिवर्तन व्यापाऱ्यांसाठी फायदेशीर ठरेल.

नामकरण आणि जावळ: लहान मुलांचे बारसे किंवा जावळ काढण्यासाठी जानेवारीचे शेवटचे चार दिवस पंचांगानुसार योग्य आहेत. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)