शनिदेवाची मूर्ती घरात का ठेवू नये? 'तो' एक भयानक शाप, तुमच्या कुटुंबाला करू शकतो उद्ध्वस्त

हिंदू धर्मात घरामध्ये देवघर असणे आणि त्यात विविध देवी-देवतांच्या मूर्तींची पूजा करणे अत्यंत शुभ मानले जाते. मात्र, शनिदेव असे एकमेव देव आहेत ज्यांची मूर्ती किंवा फोटो घरामध्ये, विशेषतः देवघरात ठेवण्यास सक्त मनाई आहे. शनिदेवाची पूजा करण्यासाठी नेहमी मंदिराचाच सल्ला दिला जातो. यामागे केवळ धार्मिक श्रद्धा नसून एक पौराणिक शाप आणि ज्योतिषशास्त्रीय कारणे दडलेली आहेत.

पत्नीचा भयानक शाप: पौराणिक कथेनुसार, शनिदेव हे भगवान श्रीकृष्णाचे निस्सीम भक्त होते. एकदा ते भक्तीत तल्लीन असताना त्यांची पत्नी त्यांच्याकडे आली. बराच वेळ प्रयत्न करूनही शनिदेवांचे लक्ष विचलित झाले नाही, त्यामुळे त्यांच्या पत्नीने रागाच्या भरात त्यांना शाप दिला की, "आजपासून तुमची नजर ज्याच्यावर पडेल, त्याचे नुकसान होईल आणि त्याचे भविष्य वाईट होईल." याच शापामुळे शनिदेवाची नजर घरात पडू नये म्हणून त्यांची मूर्ती घरात ठेवली जात नाही.

दृष्टीचा अशुभ परिणाम: शनिदेवाला मिळालेल्या शापानुसार, त्यांची नजर ज्या व्यक्तीवर किंवा वास्तूवर पडते, तिथे विनाशाचे चक्र सुरू होते. जर घरामध्ये त्यांची मूर्ती असेल, तर त्या मूर्तीची दृष्टी घरातील सदस्यांवर पडण्याची शक्यता असते. यामुळे कुटुंबात विनाकारण संकटे, आजारपण आणि दुर्दैव ओढवू शकते.

आर्थिक हानी आणि कर्ज: शनिदेवाची नजर घरात पडल्यास आर्थिक स्थितीवर त्याचा खोलवर परिणाम होतो. साठवलेला पैसा खर्च होणे, कर्जाचा डोंगर वाढणे किंवा व्यवसायात अचानक मोठे नुकसान होणे, असे अनुभव येऊ शकतात. यामुळे घरातील लक्ष्मीचा वास कमी होतो.

मानसिक तणाव आणि भीती: शनिदेव हे न्यायदेवता आणि दंडाधिकारी आहेत. घरामध्ये त्यांची मूर्ती असल्यास त्यांच्या उग्र स्वभावामुळे घरातील वातावरणात नकारात्मकता निर्माण होऊ शकते. सदस्यांमध्ये विनाकारण चिडचिडेपणा वाढणे, नैराश्य येणे किंवा मनात सतत भीतीचे सावट राहणे, असे परिणाम दिसून येतात.

कौटुंबिक कलह: शनिदेवाची मूर्ती घरात असल्यास कुटुंबातील सदस्यांमध्ये आपापसात मतभेद निर्माण होतात. पती-पत्नीमधील वाद विकोपाला जाणे किंवा मुलांच्या प्रगतीत अडथळे येणे, हे त्यांच्या दृष्टीच्या प्रभावामुळे होऊ शकते, असे मानले जाते.

ऊर्जेचा समतोल बिघडतो: घरामध्ये आपण नेहमी शांत आणि प्रसन्न मूर्ती ठेवतो. शनिदेव हे उग्र स्वभावाचे आणि कर्माचे फळ देणारे कठोर देव आहेत. घराच्या शांत वातावरणात त्यांच्या ऊर्जेचा समतोल राखणे कठीण असते, ज्यामुळे घरातील 'वास्तू दोष' वाढू शकतो. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)