Manoj Jarange : मेहुण्याला तडिपारीची नोटीस, मनोज जरांगे CM फडणवीसांवर संतापले, ''चुकीचे काम केलं तरी...''

मनोज जरांगे यांचा मेहुणा विलास खेडकर याच्यावर तडीपारीची कारवाई करण्यात आली आहे. वाळू प्रकरणासह इतर गुन्ह्यातील नऊ आरोपींना जालनासह बीड, परभणी आणि छत्रपती संभाजी नगर या जिल्ह्यातून तडीपार करण्यात आले आहे. अंबड उपविभागीय न्याय दंडाधिकारी यांच्या आदेशाने तडीपारीची कारवाई केली आहे. तडीपारीची कारवाई झालेल्या आरोपींविरोधात जालन्यातल्या अंबड, घनसावंगी आणि गोंदी पोलीस ठाण्याच्या हद्दीत गुन्हे दाखल झाले आहेत.

या कारवाईबाबत मनोज जरांगे यांनी म्हटले की, तुम्ही अंतरवालीतील आंदोलकांना जर नोटीस देणार असाल, तुम्ही त्यांच्या पाठीमागे असे लागणार असेल तर मी सोडणार नाही फडणवीस साहेब. तुम्ही जर मराठ्यांना वेठीस धरायचं काम केलं तर, तुमचा कार्यक्रम लावायला मला वेळ लागणार नसल्याचा इशाराही त्यांनी दिला. राज्यात मराठ्यांशिवाय पान हालू शकत नाही. तुझा भागलं म्हणून जर तू उलटणार असला, हे तुझ्यासाठी घातक असणार आहे, देवेंद्र फडणवीसांनी चूक सुधारावी, त्यांनी दिलेल्या नोटीसा मागे घ्याव्यात. आम्ही देवेंद्र फडणवीसला सन्मानाची वागणूक द्यायला तयार आहोत. नाहीतर पुढच्या काळात सन्मान हा शब्द डोक्यातून काढून टाकायचा असा गर्भित इशाराही मनोज जरांगे यांनी दिला.

स्वत:च्या मुलीच्या शब्दासाठी ५०० पावले ओलांडून जाऊ शकत नाही. माझ्या लेकरांचे मुडदे पडले आहेत. चार मुलांनी काही दिवसांपूर्वी आत्महत्या केली आहे. केस मागे घेणार असल्याचे सांगितले. पण, जुन्या केसेस पुन्हा उकरून काढण्यास सुरुवात झाल्याचे मनोज जरांगे यांनी सांगितले. जनतेला सन्मान द्यायला शिका. तरच लोक सन्मान देतील.