सावधान! पुणे-सोलापूर महामार्गावर प्रवास करताना सतर्क राहा; 'या' कारणांमुळे वाढले अपघातांचे प्रमाण

कदमवाकवस्ती (ता. हवेली) येथील सेवा रस्त्यावर पाइपलाइन लावण्याची परवानगी एनएचएआयने आधीच दिलेली होती. परंतु, रिव्हरव्ह्यू सिटीने नियमांचे पालन न करता असुरक्षित पद्धतीने खोदकाम केले. यामुळे एनएचएआयने तातडीने काम बंद करण्याचे आदेश दिले, तसेच परवानगी तात्पुरती रद्द करून अनुपालन अहवाल मागविला. शासकीय मालमत्तेचे नुकसान झाल्यामुळे रिव्हरव्ह्यू सिटीला दंडही आकारण्यात आला. तरीही कंपनीने पुन्हा काम सुरू करून नियमांचे उल्लंघन केले आहे, ज्यामुळे प्रशासनाला आव्हान निर्माण झाले आहे.

या घटनेनंतर स्थानिक नागरिकांमध्ये मोठा संताप व्यक्त झाला आहे. माजी सरपंच चित्तरंजन गायकवाड यांनी याबाबत तीव्र नाराजी व्यक्त केली. त्यांनी सांगितले,''रिव्हरव्ह्यू सिटीचे हे खोदकाम पूर्णपणे बेकायदा आहे. काम बंद करण्याचे आदेश असूनही कंपनीने खोदकाम सुरू केले. यामुळे महामार्गावर एखादी दुर्घटना घडली, तर त्याची जबाबदारी पूर्णपणे रिव्हरव्ह्यू सिटीवर असेल.''

गायकवाड आणि त्यांच्या सहकाऱ्यांनी वारजे येथील एनएचएआय कार्यालयात जाऊन तक्रार नोंदवली. त्यानंतर प्रशासनाने तात्काळ हस्तक्षेप करून काम बंद करण्याचे आदेश दिले. नागरिकांचे म्हणणे आहे की, नियम न पाळल्यास आणि अशा असुरक्षित खोदकामामुळे महामार्गावर वाहनधारकांसाठी धोका निर्माण होतो. त्यांनी संबंधित अधिकाऱ्यांकडे कठोर कारवाईची मागणी केली आहे.

विशेष म्हणजे, रिव्हरव्ह्यू सिटीने आधीच दिलेल्या परवानगीला दुर्लक्ष करून नियम मोडले आहेत. एनएचएआयच्या मार्गदर्शनाखाली काम करणे आवश्यक असतानाही कंपनीने स्वतःच्या सोयीसाठी हे बेकायदा काम पुन्हा सुरू केले. त्यामुळे महामार्गावरील वाहतूक, प्रवाशांची सुरक्षा आणि शासकीय मालमत्तेचे रक्षण यावर थेट परिणाम झाला आहे.

स्थानिक प्रशासन आणि नागरिकांनी या प्रकरणावर लक्ष केंद्रित केले असून रिव्हरव्ह्यू सिटीवर योग्य ती कारवाई करण्याची मागणी जोर धरत आहे. यामुळे भविष्यात अशा प्रकारच्या बेकायदा खोदकामावर कठोर बंदी घालण्याची गरज निर्माण झाली आहे.