बदलापूरमधील घटनेने महाराष्ट्र हादरला, पालकांच्या मनात वाढली भीती, पुण्यातील महिलांच्या प्रतिक्रिया, VIDEO

पुणे : गेल्या काही दिवसात महाराष्ट्रात लैंगिक अत्याचाराच्या घटनांमध्ये मोठ्या प्रमाणात वाढ झाल्याचे दिसून येत आहे. त्यातच आता बदलापूरमधील घटनेने महाराष्ट्राला मोठा हादरा बसला आहे. यामुळे शाळेत जाणाऱ्या मुलींमध्ये आणि इतरही मुलींमध्ये मोठ्या प्रमाणात भीतीचे वातावरण निर्माण झाले आहे. पुणे जिल्ह्यातील पालक वर्गाकडून या विषयी संतप्त प्रतिक्रिया येऊ लागल्या आहेत.

आपल्या मुली शाळेत जाताना तरी सुरक्षित असतात का, अशी काळजी त्यांना वाटू लागली आहे. रस्त्यावर टवाळखोर मुलांचा उन्माद सुरू आहे. त्याकडे पोलीस प्रशासन कधी लक्ष घालणार, अशा विनवण्या करू लागले आहेत. लोकल18 च्या प्रतिनिधीने पुण्यातील काही महिलांशी संवाद साधला, यावेळी त्यांनी सांगितले की, आपल्या मुली या आता शाळेतही सुरक्षित नाहीत. त्याचबरोबर शाळकरी मुली या शाळेत जाताना रिक्षा किंव्हा टॅक्सीद्वारे जात असतात. त्यामध्ये 4 पेक्षा अनेक पॅसेंजर रिक्षात बसवल्याने मुलींना चुकीच्या पद्धतीने स्पर्श केले जाते. शाळेमध्ये महिला कर्मचारी मुलांवर लक्ष ठेवण्यासाठी नेमण्यात याव्या, अशी मागणीही त्यांनी केली.