Pune Double Decker Bus: वाहतूक कोंडीचा प्रश्नच सुटणार, पुण्यात डबल डेकर बस धावणार, कुठं आणि कधी? संपूर्ण माहिती

पुणे शहरातील वाढती लोकसंख्या आणि रस्त्यांवरील वाहनांची गर्दी यामुळे वाहतूक कोंडी हा मोठा प्रश्न आहे. अरुंद रस्ते, वाढते खासगी वाहनांचे प्रमाण आणि सतत वाढणारी प्रवाशांची संख्या यामुळे सार्वजनिक वाहतुकीवर मोठा ताण पडत आहे. अशा परिस्थितीत डबल डेकर बस हा उपाय प्रवाशांसाठी दिलासा ठरू शकतो, असे पीएमपीएमएलचे अध्यक्ष व व्यवस्थापकीय संचालक पंकज देवरे म्हणाले.

बस अत्याधुनिक सोयींनी सुसज्ज असून पूर्णपणे वातानुकूलित आहे. त्यात सीसीटीव्ही कॅमेरे, एसी सुविधा तसेच वायफायचीही सोय करण्यासाठी प्रयत्न सुरू आहेत. प्रवाशांच्या सुरक्षिततेसह आरामदायी प्रवासावर विशेष भर देण्यात आला आहे. ही बस इलेक्ट्रिक असल्यामुळे पर्यावरणपूरक असून, फक्त 2 तास चार्जिंगनंतर ती तब्बल 150 किलोमीटर धावू शकते.

प्रारंभीच्या टप्प्यात दहा डबल डेकर बस पीएमपीएमएलच्या ताफ्यात सामील करण्याची योजना आखण्यात आली आहे. या बस ‘स्विच’ कंपनीकडून तयार करण्यात आल्या असून, त्यांची उंची 4.75 मीटर, रुंदी 2.6 मीटर आणि लांबी 9.5 मीटर इतकी आहे. प्रत्येक बसची किंमत तब्बल दोन कोटी रुपये आहे.

डबल डेकर इलेक्ट्रिक बस ही पुण्यातील सार्वजनिक वाहतुकीसाठी एक नवे पर्व ठरेल. प्रवाशांना आरामदायी व सुरक्षित प्रवास मिळणार असून, पर्यावरणपूरक वाहतूक व्यवस्थेकडेही हे एक महत्त्वाचे पाऊल असेल. तसेच, या बसमुळे गर्दीच्या वेळेत मोठ्या प्रमाणावर प्रवासी एका फेरीत प्रवास करू शकतील. या बससाठी तिकीटदर सध्याच्या एसी पीएमपीएमएल बसप्रमाणेच असणार आहे. त्यामुळे अतिरिक्त खर्च न करता प्रवाशांना अधिक आरामदायी आणि जलद प्रवासाचा लाभ घेता येणार आहे.

पुण्यातील आयटी पार्क परिसर तसेच गर्दीच्या मार्गांवर या बस धावणार असल्याने हजारो पुणेकरांचा प्रवास सुलभ होणार आहे. डबल डेकर बसच्या रूपाने पुण्याला नवी ओळख मिळणार असून, सार्वजनिक वाहतूक सुधारण्याच्या दिशेने हे एक महत्त्वाचे पाऊल मानले जात आहे.