Guru Purnima 2025: गुरुपौर्णिमा म्हणजे काय? कोण होते पहिले गुरू? परंपरा आणि पूजा पद्धती, पाहा संपूर्ण माहिती

पुराणकथांनुसार, आदियोगी भगवान शंकर हे जगाचे पहिले गुरू मानले जातात. शंकर भगवान दीर्घ काळ योगनिद्रेत गेले होते. त्यांच्याकडून ज्ञान प्राप्त करण्यासाठी सप्तर्षींनी हजारो वर्षे तप केले. अखेर आषाढ पौर्णिमेच्या दिवशी भगवान शंकर प्रसन्न झाले आणि त्यांनी सप्तर्षींना योग, ध्यान व आत्मज्ञान याचे दिव्य शिक्षण दिले. याच दिवशी गुरुपौर्णिमेचा आरंभ झाला, असे मानले जाते. म्हणूनच हा दिवस संपूर्ण जगात ‘गुरूंच्या स्मरणाचा दिवस’ म्हणून पवित्र मानला जातो.

गुरुपौर्णिमेच्या दिवशी सकाळी स्नान, गुरूंची पूजा, मंत्रजप, ध्यान, आणि दानधर्म याचे विशेष महत्त्व असते. शिष्य आपल्या गुरूला भेट देतात, त्यांचे आशीर्वाद घेतात आणि जीवनात नवे संकल्प करतात. काही ठिकाणी सार्वजनिक कीर्तन, प्रवचन आणि ध्यानसत्रांचं आयोजन देखील केलं जातं.