अंबाबाई देवीचा अवभृत स्नान सोहळा पाहिलात का? जाणून घ्या धार्मिक महत्त्व, Video

कोल्हापूर म्हटलं की अंबाबाई देवी हे समीकरण दृढ आहे. मग अंबाबाई देवीच्या विविध उत्सवांच्या वेळी देखील कोल्हापूरकर मोठ्या संख्येने, भक्तिपूर्ण भावनेने उपस्थिती लावत असतात. अवभृत स्नान विधीवेळी देखील शेकडो भाविक हा सोहळा याची देही याची डोळा अनुभवण्यासाठी पंचगंगा नदी घाटावर जमले होते. तर मंदिरापासून पंचगंगा नदी पर्यंत काढण्यात आलेल्या पालखी मार्गावर देखील नागरिक वाट पाहत थांबले होते.

अनुष्ठान समाप्तीनंतर अवभृत स्नानासाठी सकाळी शाही लवाजम्यासह देवीची उत्सवमूर्ती पालखीतून पंचगंगा नदीकडे रवाना झाली. पंचगंगा नदीतीरावर गेली कित्येक वर्षांच्या परंपरेप्रमाणे धार्मिक विधी होऊन देवी आणि समस्त भक्तजनांचे गंगास्नान अर्थातच देवीचा अवभृत स्नान सोहळा संपन्न झाला. यानंतर जलक्रीडा करून देवीची उत्सवमूर्ती पारंपारिक मार्गाने पालखीतून मंदिरात आणण्यात आली. नंतर पूर्णाहुती होऊन पुरुषोत्तम मासानिमित्त आयोजित अनुष्ठानाची सांगता करण्यात आली.

त्याचबरोबर यज्ञाच्या पूर्ण फळाच्या प्राप्तीसाठी यज्ञ साहित्यासह यजमान पुरोहित आणि देवता यांनी क्षेत्रातील पवित्र नदी किंवा जलप्रवाहाच्या ठिकाणी जाऊन स्नान करावे, अशी अवभृत स्नानाची पद्धत आहे. त्यानुसारच यंदाही भक्तजनांच्या उपस्थितीत पंचगंगा नदीतिरावर अंबाबाई देवीचा हा सोहळा पार पडला, असेही मालेकर यांनी सांगितले.