'या' मंदिरात भिक्षा ग्रहण करण्यासाठी येतात गुरुदेव दत्त; पाहा काय सांगितली जाते महती Video

श्री दत्त महाराजांच्या गिरनार, माहुरगड आणि करवीर या तीन महत्वाच्या ठिकाणांपैकी करवीर हे भिक्षा स्थान आहे. गुरुचरित्रातील एका अध्यायामध्ये असणारा करवीर भिक्षा असा उल्लेख करवीर नगरीशी निगडित आहे. या दत्त मंदिराच्या शेजारीच एकवीरा देवीचे मंदिर आहे. श्री नागनाथ महाराजांनी श्री करवीर निवासिनी अंबाबाई मंदीरामध्ये श्री दत्त महाराजांच्या भेटीसाठी अन्नछत्र चालू केले. जे सिद्धीचे अन्न घेत नाहीत ते दत्त महाराज असे मानतात. त्यावेळी श्री दत्त महाराजांना एकवीरा देवीने भिक्षा दिली, म्हणून हे भिक्षास्थान मानले जाते. श्री गुरुदेव दत्तांना शोधत नागनाथ महाराज दुपारी 12 वाजता या भिक्षालिंग स्थानावर आले असल्याची माहीती देखील नवनाथ ग्रंथामध्ये पाहायला मिळते, अशी माहिती मंदिराचे पुजारी पुरोहित बाळासो दादर्णे यांनी दिली आहे.

त्यापुढे मंदिराच्या छताला भेदून गेलेले उंचच उंच उंबराचे झाड पाहायला मिळते. त्याच्या शेजारी महादेवाची पिंड आणि श्री गणेश, नागनाथ यांच्या मूर्ती आहेत. दत्त मंदिराच्या गाभाऱ्यात समोर मोठी पिंड आणि त्यावर ब्रम्हा, विष्णू, महेश या तिन्ही गुणांची लिंग आहेत. या पिंडीला आकर्षक अशा पाना-फुलांनी सजविण्यात येते. आत गाभाऱ्यात दत्त पादुका देखील आहेत. तर या पिंडीच्या उजव्या बाजूस श्री दत्तात्रयांची उत्सवमुर्ती आणि डाव्या बाजूला छोटी संगमरवरी श्री गहनीनाथ महाराज यांची मुर्ती आहे.

(सूचना : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. न्यूज 18 मराठी त्याची हमी देत नाही.)