आशिया कपच्या 4 मॅचमध्ये डक, तरी पाकिस्तानी खेळाडू झाला नंबर वन, डोकं चक्रावून टाकणारी ICC T20 रँकिंग!
- Published by:Shreyas Deshpande
Last Updated:
आशिया कपमधील सगळे सामने जिंकत फायनल पटकावणाऱ्या टीम इंडियाने आयसीसीच्या टी-20 क्रमवारीमध्येही दणका दिला आहे.
मुंबई : आशिया कपमधील सगळे सामने जिंकत फायनल पटकावणाऱ्या टीम इंडियाने आयसीसीच्या टी-20 क्रमवारीमध्येही दणका दिला आहे. टी-20 क्रमवारीमध्ये भारताचे बॅटर आणि बॉलर पहिल्या क्रमांकावर आहेत, पण पहिल्या क्रमांकावरच्या ऑलराऊंडरचं नाव ऐकून अनेक क्रिकेट चाहते चक्रावून गेले आहेत. आशिया कपच्या 7 सामन्यांमध्ये 4 वेळा शून्यवर आऊट होणारा सॅम अयुब ऑलराऊंडरच्या क्रमवारीमध्ये पहिल्या क्रमांकावर पोहोचला आहे. आशिया कपच्या 7 सामन्यांमध्ये सॅम अयुबने फक्त 37 रन केल्या.
सॅम अयुबने टी-20 ऑलराऊंडरच्या क्रमवारीमध्ये हार्दिक पांड्याला पहिल्या क्रमांकावरून खाली खेचलं आहे. या क्रमवारीमध्ये हार्दिक पांड्या आता दुसऱ्या क्रमांकावर पोहोचला आहे. श्रीलंकेविरुद्धच्या सामन्यात दुखापत झाल्यामुळे हार्दिक पाकिस्तानविरुद्धच्या फायनलमध्ये खेळू शकला नव्हता. ऑलराऊंडरच्या क्रमवारीमध्ये अक्षर पटेल एक स्थान वरती 10व्या क्रमांकावर आला आहे.
सॅम अयुब कसा झाला नंबर वन?
आशिया कपच्या 7 सामन्यांमध्ये सॅम अयुब तब्बल 4 सामन्यांमध्ये शून्य रनवर आऊट झाला, तर उरलेल्या 3 सामन्यांमध्ये त्याने 37 रन केले, पण 7 मॅचमध्ये 8 विकेट घेतल्यामुळे सॅम अयुब ऑलराऊंडरच्या क्रमवारीमध्ये पहिल्या क्रमांकावर पोहोचला आहे.
advertisement
टॉप-10 बॅटरमध्ये 3 भारतीय
दुसरीकडे टी-20 क्रमवारीत टॉप-10 बॅटरमध्ये 3 भारतीय खेळाडूंचा समावेश आहे. अभिषेक शर्मा टी-20 क्रमवारीमध्ये पहिल्या क्रमांकावर तर तिलक वर्मा तिसऱ्या क्रमांकावर आहे. आशिया कपमध्ये निराशाजनक कामगिरी करणाऱ्या सूर्यकुमार यादवला क्रमवारीमध्ये दोन स्थानांचा फटका बसला आहे. सूर्यकुमार यादव सहाव्या क्रमांकावरून आठव्या क्रमांकावर पोहोचला आहे.
बॉलरच्या क्रमवारीमध्ये वरुण चक्रवर्ती पहिल्या क्रमांकावर आहे. आशिया कपच्या फायनलमध्ये 4 विकेट घेणाऱ्या कुलदीप यादवला 9 स्थानांचा फायदा झाला असून तो 12व्या क्रमांकावर आला आहे. तर देशांच्या टी-20 क्रमवारीमध्येही टीम इंडियाने पहिला क्रमांक कायम राखला आहे.
Location :
Mumbai,Maharashtra
First Published :
October 02, 2025 7:25 PM IST
मराठी बातम्या/स्पोर्ट्स/
आशिया कपच्या 4 मॅचमध्ये डक, तरी पाकिस्तानी खेळाडू झाला नंबर वन, डोकं चक्रावून टाकणारी ICC T20 रँकिंग!
