IND vs SA Final : टीम इंडिया पहिल्यांदाच चॅम्पियन कशी झाली? वर्ल्ड कप फायनलचे टर्निंग पॉईंट, तिघींनी अख्खी मॅच फिरवली!
- Published by:Shreyas Deshpande
Last Updated:
महिला वर्ल्ड कप जिंकून टीम इंडियाने इतिहास घडवला आहे. फायनलमध्ये टीम इंडियाने दक्षिण आफ्रिकेचा 52 रननी पराभव केला आहे. भारताच्या महिला टीमला पहिल्यांदाच वर्ल्ड कप जिंकता आला आहे.
नवी मुंबई : महिला वर्ल्ड कप जिंकून टीम इंडियाने इतिहास घडवला आहे. फायनलमध्ये टीम इंडियाने दक्षिण आफ्रिकेचा 52 रननी पराभव केला आहे. भारताच्या महिला टीमला पहिल्यांदाच वर्ल्ड कप जिंकता आला आहे. याआधी भारतीय टीम दोन वेळा वर्ल्ड कपच्या फायनलमध्ये पोहोचली होती, पण दोन्ही वेळा टीमच्या पदरी निराशा आली होती. यंदा मात्र घरच्या मैदानामध्ये भारतीय महिला टीमने ऐतिहासिक कामगिरी करत ट्रॉफीवर आपलं नाव कोरलं आहे. भारताने दिलेलं 299 रनचं आव्हान पार करण्यासाठी आलेल्या दक्षिण आफ्रिकेचा 45.3 ओव्हरमध्ये 246 रनवर ऑलआऊट झाला. या सामन्यात पहिले बॅटिंग करणाऱ्या भारताने 50 ओव्हरमध्ये 7 विकेट गमावून 298 रन केल्या.
टीम इंडियाला हा ऐतिहासिक विजय मिळवून देण्यात भारताच्या 3 खेळाडूंनी महत्त्वाची भूमिका बजावली. बॅटिंग, बॉलिंग तसंच फिल्डिंगमध्ये या तीन खेळाडूंनी केलेल्या धमाकेदार कामगिरीमुळे मॅच भारताच्या बाजूने फिरली.
दीप्ती शर्माचा वर्ल्ड रेकॉर्ड
दीप्ती शर्माने पहिले बॅटिंगमध्ये 58 बॉलमध्ये 58 रनची खेळी केली, ज्यामुळे भारताला मोठा स्कोअर करता आला. त्यानंतर दीप्तीने बॉलिंगमध्येही धमाका केला. दीप्तीने 9.3 ओव्हरमध्ये फक्त 39 रन देऊन 5 विकेट घेतल्या. दीप्तीने या वर्ल्ड कपच्या 7 इनिंगमध्ये 215 रन केल्या. ज्यात 3 अर्धशतकांचा समावेश आहे. याचसोबत दीप्तीने वर्ल्ड कपमध्ये 22 विकेट घेतल्या. दीप्ती शर्मा स्पर्धेत सर्वाधिक विकेट घेणारी खेळाडू ठरली. एका वनडे वर्ल्ड कपमध्ये 200 पेक्षा जास्त रन करणारी आणि 15 विकेट घेणारी दीप्ती शर्मा पहिली खेळाडू ठरली आहे.
advertisement
शफाली वर्मा ठरली हुकमी एक्का
शफाली वर्माने फायनलमध्ये ओपनिंगला बॅटिंग करत 78 बॉलमध्ये 87 रन केले, ज्यात 7 फोर आणि 2 सिक्सचा समावेश होता. याशिवाय शफालीने 2 विकेट घेतल्या. शफाली वर्मा ही भारतीय टीमचा भाग नव्हती, पण प्रतिका रावलला ग्रुप स्टेजच्या शेवटच्या सामन्यात दुखापत झाल्यामुळे शफाली वर्माची टीम इंडियात एन्ट्री झाली, यानंतर ती ऑस्ट्रेलियाविरुद्धची सेमी फायनल आणि दक्षिण आफ्रिकेविरुद्धची फायनल खेळली. फायनलमधल्या खेळीबद्दल शफाली वर्माला प्लेअर ऑफ द मॅच देऊन गौरवण्यात आलं.
advertisement
अमनजोतची तुफान फिल्डिंग
भारताने दिलेल्या 299 रनच्या आव्हानाचा पाठलाग करायला आलेल्या दक्षिण आफ्रिकेची सुरूवात चांगली झाली. कर्णधार लॉरा वॉलवार्टड आणि तझमिन ब्रिट्स यांच्यात 51 रनची पार्टनरशीप झाली, पण अमनजोत कौरने केलेल्या डायरेक्ट हिटमुळे भारताला पहिली विकेट मिळाली आणि तझमिन ब्रिट्स 23 रनवर पॅव्हेलियनमध्ये परतली. यानंतर अमनजोतने लॉरा वॉलवार्टडचाही कॅच पकडला. सुरूवातीला अमनजोतच्या हातातून दोन वेळा बॉल सुटला, पण तिसऱ्यांदा तिने डाईव्ह मारून कॅच पकडला आणि भारताचा विजय निश्चित झाला.
view commentsLocation :
Navi Mumbai,Thane,Maharashtra
First Published :
November 03, 2025 12:42 AM IST
मराठी बातम्या/स्पोर्ट्स/
IND vs SA Final : टीम इंडिया पहिल्यांदाच चॅम्पियन कशी झाली? वर्ल्ड कप फायनलचे टर्निंग पॉईंट, तिघींनी अख्खी मॅच फिरवली!
