T20 World Cup ला 27 दिवस शिल्लक असताना टीमची घोषणा, फक्त 11 आयपीएल मॅच खेळणाऱ्याला केलं कॅप्टन!

आयसीसी टी-ट्वेंटी वर्ल्ड कप 2026 साठी आयर्लंडने आपल्या 15 सदस्यांच्या टीमची घोषणा केली आहे. या महत्त्वाच्या स्पर्धेत अनुभवी फलंदाज पॉल स्टर्लिंग आयर्लंडचे नेतृत्व करणार असून लॉर्कन टकर याच्याकडे उपकॅप्टन पदाची जबाबदारी सोपवण्यात आली आहे. आयर्लंडला ग्रुप बी मध्ये श्रीलंका, झिम्बाब्वे, ओमान आणि ऑस्ट्रेलिया यांसारख्या बलाढ्य संघांसोबत स्थान मिळाले आहे. या वर्ल्ड कप मोहिमेची सुरुवात आयर्लंड 8 फेब्रुवारी रोजी श्रीलंकेविरुद्धच्या मॅचमधून करणार आहे.

आयर्लंडची ही टी-ट्वेंटी वर्ल्ड कपमधील नववी वेळ असणार आहे. यापूर्वी 2009 आणि 2022 मध्ये त्यांनी प्रभावी कामगिरी करत दुसऱ्या फेरीपर्यंत मजल मारली होती. यंदाच्या संघात टिम टेक्टर, बेन कॅलिट्झ आणि मॅथ्यू हम्फ्रीज ही नवीन नावे पाहायला मिळत आहेत. निवडण्यात आलेल्या 15 पैकी 12 खेळाडू हे गेल्या वर्ल्ड कपमध्ये देखील टीमचा भाग होते, ज्यामुळे त्यांच्याकडे मोठा अनुभव गाठीशी आहे.

या टीममध्ये 26 वर्षांचा फास्ट बॉलर जोशुआ लिटल याच्यावर सर्वांच्या नजरा असतील. जोशुआ लिटल याने आयपीएलमध्ये गुजरात टायटन्ससाठी खेळताना ११ मॅचमध्ये ११ विकेट्स घेतल्या आहेत. त्याने आयर्लंडसाठी 74 टी-ट्वेंटीमध्ये 82 तर 42 वनडे मॅचमध्ये 61 विकेट्स घेतल्या आहेत. त्याच्या धारदार बॉलिंगमुळे आयर्लंडला मधल्या ओव्हर्समध्ये विकेट मिळवून देण्याची मोठी आशा असेल.

आयर्लंडची संपूर्ण टीम - पॉल स्टर्लिंग (कॅप्टन), मार्क एडायर, रॉस एडायर, बेन कॅलिट्झ, कर्टिस कॅम्फर, गॅरेथ डेलानी, जॉर्ज डॉकरेल, मॅथ्यू हम्फ्रीज, जोशुआ लिटल, बॅरी मॅकार्थी, हॅरी टेक्टर, टिम टेक्टर, लॉर्कन टकर, बेन व्हाईट आणि क्रेग यंग.