निवृत्त होण्याची वेळ आलीय..., 1030 दिवसांपासून शतकच ठोकलं नाही, कोण आहे स्टार खेळाडू?

पाकिस्तान आणि दक्षिण आफ्रिका यांच्यातील दोन कसोटी सामन्यांच्या मालिकेतील दुसरा सामना सोमवार (20 ऑक्टोबर) रावळपिंडी येथे सुरू झाला आहे. या सामन्यात पाकिस्तानने 38 वर्षीय आसिफ आफ्रिदीला पहिला कसोटी सामना खेळण्याची संधी दिली.गेल्या 70 वर्षात तो संघासाठी कसोटी पदार्पण करणारा सर्वात वयस्कर खेळाडू आहे. कर्णधार शान मसूदने नाणेफेक जिंकून फलंदाजी करण्याचा निर्णय घेतला होता. या सामन्यात पाकिस्तान संघाचा दिग्गज फलंदाज बाबर आझम पुन्हा एकदा मोठी खेळी करण्यात अपयशी ठरला.अशाप्रकारे तो सलग सातव्या डावात अर्धशतक झळकावू शकला नाही.

इमाम-उल-हक हा पहिल्या डावात बाद होणारा पहिला फलंदाज होता. त्याने 35 चेंडूत फक्त 17 धावा केल्या आणि सायमन हार्मरच्या गोलंदाजीवर काइल व्हेरेनने त्याला झेलबाद केले. तिसऱ्या क्रमांकावर कर्णधार मसूद आला आणि अब्दुल्ला शफीकसोबत दुसऱ्या विकेटसाठी 111 धावांची भागीदारी केली. शफीक 146 चेंडूत 57 धावा करून बाद झाला, त्याने चार चौकार मारले. शफीकनंतर अनुभवी बाबर आझम क्रीजवर आला. संघाला त्याच्याकडून मोठ्या आशा होत्या.

बाबरने 61 कसोटी सामन्यांमध्ये 111 डावांमध्ये नऊ शतके झळकावली आहेत. डिसेंबर 2022 मध्ये कराची येथे न्यूझीलंडविरुद्ध त्याची शेवटची धावसंख्या 161 होती. त्यानंतर त्याने एकही शतक झळकावले नाही.आता तो स्वस्त बाद झाल्यामुळे चाहत्यांना राग आला आणि त्यांनी सोशल मीडियावर त्यांचा राग काढला. काहींनी बाबरला निवृत्तीचा सल्ला दिला, तर काहींनी तो संघावर ओझे बनल्याची टीका केली आहे.