IND vs ENG : इंग्लंडविरुद्धच्या पहिल्या कसोटी सामन्यात पाच विकेटने पराभव झाल्यानंतर भारतीय संघाचा कर्णधार शुभमन गिल खूपच निराश दिसत होता. या दारुण पराभवानंतर शुभमन गिलने कबूल केले की खालच्या फळीतील फलंदाजांना धावा काढण्यात अपयश येणे हे पराभवाचे मुख्य कारण होते. उपकर्णधार ऋषभ पंतने दोन्ही डावात शतक झळकावले तर गिल, यशस्वी जयस्वाल आणि केएल राहुल यांनीही शतके झळकावली, परंतु भारत दोन्ही डावात अपेक्षित मोठी धावसंख्या उभारू शकला नाही आणि अनेक महत्त्वाचे झेलही चुकले. एका वेळी पहिल्या डावात तीन बाद 359 धावा झाल्यानंतर संपूर्ण संघ 471 धावांवर ऑलआउट झाला. दुसऱ्या डावातही शेवटचे सहा विकेट 77 धावांच्या आत पडले.