Prithvi Shaw : कर्णधार बनताच पृथ्वीने मॅच फिरवली, वादळी खेळीने जिंकला सामना,महाराष्ट्राचा दणदणीत विजय

सध्या देशांतर्गत क्रिकेटमध्ये सय्यद मुश्ताक अली ट्रॉफी ही स्पर्धा खेळवली जात आहे. या स्पर्धेसाठी महाराष्ट्र या संघाची जबाबदारी पृथ्वी शॉच्या खांद्यावर देण्यात आली आहे. ही जबाबदारी मिळताच पृथ्वी शॉने 66 धावांची वादळी खेळी करून सामन्याचा निकाल बदलला आहे.

खरं तर हैदराबादने महाराष्ट्रसमोर 192 धावांचे लक्ष्य ठेवले होते. या लक्ष्याचा पाठलाग करताना महाराष्ट्राकडून कर्णधार पृथ्वी शॉ आणि अर्शिन कुलकर्णी सलामीसाठी मैदानात उतरले होते. या दोघांनी पहिल्या बॉलपासून प्रहार करायला सूरूवात केली होती.यावेळी पृथ्वी शॉने 36 बॉलमध्ये 66 धावांची खेळी केली होती. या खेळीत त्याने 3 षटकार आणि 9 चौकार मारले होते. या दरम्यान त्याचा स्ट्राईक रेट 183 होता.

पृथ्वी नंतर आझिम काझी 8 धावांवर बाद झाला. त्यानंतर राहुल त्रिपाठी मैदानात आला होता.त्याने 11 बॉलमध्ये 26 धावांची खेळी केली होती. तसेच अर्शिन कुलकर्णी हा 54 बॉलमध्ये 89 धावा करून नाबाद राहिला. या खेळीत त्याने 12 चौकार आणि 2 षटकार मारले आहेत. त्यामुळे पृथ्वीच्या 66 धावा आणि अर्शिन कुलकर्णीच्या 89 धावाच्या बळावर महाराष्ट्राने हैदराबादचा 8 विकेटने पराभव केला आहे. दरम्यान हैदराबादकडून चिन्नतला रेड्डी आणि अजय गौडने प्रत्येकी 1 विकेट घेतली आहे.

हैदराबादने प्रथम फलंदाजी करताना 8 विकेट गमावून 191 धावा ठोकल्या होत्या. हैदराबादकडून कर्णधार मिलिंदने नाबाद सर्वाधिक 35 धावा केल्या होत्या. या व्यतिरीक्त कुणालाही फारशा धावा करता आल्या नाही. तरी देखील हैदराबाद 191 धावा करू शकली होती. महाराष्ट्राकडून जलज सक्सेना सर्वाधिक 2, हगंरगेकर, विकी ऑस्टवाल आणि रामकृष्ण गोशने प्रत्येकी 1 विकेट घेतली होती.