Success story: ती हरली नाही लढली! 8 वर्ष तयारी, 5 वेळा मुलाखतीमध्ये अपयश, आता झाली सरकारी अधिकारी

शिवपुरी जिल्ह्यातील खांदी नावाच्या लहान गावात भारती धाकड यांचा जन्म झाला. त्यांचे वडील सब-इंजिनिअर आहेत, तर आई घर सांभाळते. भारती यांनी ग्वाल्हेरमधून कॉम्प्युटर सायन्समध्ये बी.ई. पदवी मिळवली. तंत्रज्ञानाच्या दुनियेत त्यांनी मोठी स्वप्नं पाहिली, पण त्यांच्या मनात सिव्हिल सर्विसेसमध्ये जाण्याचे ध्येय होते. इंजिनीअरिंगची पदवी मिळताच त्यांनी दिल्ली गाठली आणि कोचिंग क्लास लावला, पण लवकरच त्या इंदूरला स्थलांतरित झाल्या. तेथे वसतिगृहात राहून त्यांनी तयारी सुरू केली. सकाळपासून रात्रीपर्यंत कधी सामान्य ज्ञान, कधी नकाशे तर कधी चालू घडामोडींचा अभ्यास करण्यात त्या पूर्णपणे मग्न होत्या.

२०१७ मध्ये भारती यांनी एमपीपीएससीची तयारी सुरू केली. पहिल्याच प्रयत्नात त्यांनी प्रीलिम्स आणि मेन्स पास करून मुलाखतीपर्यंत मजल मारली, पण यश मिळाले नाही. २०१८, २०१९, २०२०, आणि २०२२ मध्ये असे एकूण चार वेळा त्या मुलाखतीपर्यंत पोहोचल्या, पण प्रत्येक वेळी त्यांना अयशस्वी व्हावे लागले. २०२१ मध्ये तर त्या मेन्स परीक्षाही उत्तीर्ण होऊ शकल्या नाहीत. एवढेच नव्हे, तर २०२३ चा अंतिम निकाल येण्यापूर्वी त्यांनी २०२४ ची राज्यसेवा परीक्षा दिली, ज्यात त्या प्रीलिम्सही पास करू शकल्या नाहीत. आठ वर्षे सलग अभ्यास करूनही अपयश मिळत असतानाही त्यांनी हिंमत गमावली नाही.

एवढ्या अपयशानंतरही भारती धाकड यांनी हार मानली नाही. त्या स्वतः सांगतात की, अनेकदा मनात खूप निराशा यायची आणि सगळं सोडून द्यावं असं वाटायचं. पण, त्यांच्या कुटुंबाने त्यांच्यावर कधीही दबाव आणला नाही. त्यांचे आई-वडील नेहमी त्यांना धीर द्यायचे आणि म्हणायचे, "बेटी, मुलींना मजबूत बनावे लागते आणि स्वतःच्या पायांवर उभे राहावे लागते." याच शब्दांनी त्यांना नवी ऊर्जा दिली. घरातून पूर्ण पाठिंबा होता. कधी वडिलांच्या जुन्या कथा ऐकत, तर कधी आईचा हात धरून रडत, पण दुसऱ्याच दिवशी त्या पुन्हा पुस्तके उघडायच्या. त्यांना विश्वास आहे की, प्रत्येक अपयशाने त्यांना काहीतरी शिकवले.

२०२३ च्या मुलाखतीनंतर मात्र भारती यांना वेगळी अनुभूती मिळाली. त्यांना सगळे काही व्यवस्थित वाटत होते, जणू काही 'बॉर्डर पार' झाली आहे. आणि त्यांचा हा अंदाज खरा ठरला! ८ नोव्हेंबर २०२५ रोजी एमपीपीएससीने जेव्हा २०२३ चा अंतिम निकाल जाहीर केला, तेव्हा १९७ उमेदवारांच्या यादीत भारती यांचे नाव होते. मेन्समध्ये ७०२.५० आणि मुलाखतीत १२४ अशा एकूण ८२६ गुणांसह त्यांनी परीक्षा उत्तीर्ण केली आणि विकास गट अधिकारी बनल्या. "खुशीपेक्षा जास्त मला आश्चर्य वाटले," अशी त्यांची प्रतिक्रिया होती. भारती यांची ही कहाणी स्पर्धा परीक्षेची तयारी करणाऱ्या लाखो विद्यार्थ्यांसाठी एक उत्तम उदाहरण आहे. सफलता एका रात्रीत मिळत नाही; त्यासाठी संयम ठेवावा लागतो.

भारती धाकड यांच्यासाठी हा प्रवास इथे संपलेला नाही, हा फक्त एक पडाव आहे. त्यांचे डिप्टी कलेक्टर बनण्याचे स्वप्न अजूनही बाकी आहे. त्यासाठी त्यांना आता २०२५ च्या राज्य सेवा परीक्षेची मेन्स द्यायची आहे. त्या सांगतात की, त्या यासाठी पूर्ण प्रयत्न करतील. त्यामुळे, तुम्हीही जर एमपीपीएससीची तयारी करत असाल, तर भारती यांच्यासारखे मजबूत व्हा!