Trending:

Sunday Good News: वारसा हक्कांना अवघ्या 2 महिन्यात मिळणार सरकारी नोकरी; पण कोणाला?

Published by:Tanvi
local18

Last Updated:November 30, 2025 6:58 AM IST

Thane Municipal Jobs : ठाणे महापालिकेत वारसा हक्काने नोकरी मिळण्याचा मार्ग आता सुलभ झाला आहे. आधी वर्षानुवर्षे प्रकरणे प्रलंबित राहत होती, मात्र आता दोन ते तीन महिन्यांत मंजुरी मिळणार आहे.

इम्पॅक्ट शॉटतुमचा गेटवे लेटेस्ट न्यूज

ठाणे : ठाणे महापालिकेत वारसा हक्काने नोकरी मिळवण्यासाठी आतापर्यंत अनेक वारसांना धावाधाव करावी लागत होती.ज्यात सेवानिवृत्त सफाई कामगारांच्या वारसांना महापालिकेच्या सेवेत सामावून घेण्याची प्रक्रिया इतकी गुंतागुंतीची होती की अनेकांचे अर्ज अनेक वर्ष प्रलंबित राहायचे. मात्र,आता ही जुनी समस्या मोठ्या प्रमाणात दूर होणार आहे. कारण महापालिकेने वारसा हक्काची प्रक्रिया जलद करण्याचा निर्णय घेतला असून येत्या दोन ते तीन महिन्यांत वारसा हक्काने नोकरी मिळण्याचा मार्ग अधिक सोपा होणार आहे.

सेवानिवृत्त कर्मचाऱ्यांच्या कुटुंबांना दिलासा

महापालिकेतील आकडेवारीनुसार दरवर्षी साधारण 800 ते 900 कर्मचारी सेवानिवृत्त होत असतात. ज्यात मोठ्या प्रमाणावर सफाई विभागातील कर्मचारी असतात. त्यांच्या वारसांना कायमस्वरूपी नोकरी मिळण्यासाठी आधी अनेक पायऱ्या पार कराव्या लागत तसेच विविध कागदपत्रांची पडताळणी करताना अनेकदा प्रक्रिया अडकून राहायची. 2023 पर्यंत महापालिकेने तब्बल 350 प्रकरणांचा निर्णय केला होता. त्यानंतर 2024 मधील 70 प्रकरणे मार्गी लावण्यात आली. आता 2025 मधील राहिलेले 65 प्रकरणेही लवकरच मार्गी करणार आहेत अशी माहिती प्रशासनाने दिली आहे.

एवढंच नाही तर वारसा हक्काची प्रक्रिया आणखी सुलभ करण्यासाठी प्रभाग समितीनिहाय कार्यपद्धती आखण्यात येत आहे. प्रत्येक प्रभाग कार्यालयातच आवश्यक कागदपत्रे स्वीकारली जातील. कागदपत्रांची पहिली तपासणी करून ती फाईल मुख्य कार्यालयाकडे पाठवली जाईल मग त्यानंतर शेवटच्या मंजुरीसाठी आवश्यक असलेली प्रक्रिया केंद्रीकृत स्वरूपात लवकर पूर्ण केली जाणार असून संपूर्ण कामकाजाला जवळपास दोन ते तीन महिन्यांचा कालावधी लागू शकतो.

महापालिकेच्या या निर्णयामुळे वारसांना वारंवार महापालिकेच्या विविध विभागांत हेलपाटे घालण्याची गरज राहणार नाही. कागदपत्र पडताळणीपासून अंतिम आदेशापर्यंतचा प्रवास आता ठराविक वेळेत पूर्ण होणार असल्यामुळे वारसांना लवकर नोकरी मिळण्याची शक्यता वाढली आहे.

view comments