Trending:

डोनाल्ड ट्रम्प यांची फ्रान्सला धमकी, मॅक्रॉन यांचा Private Message सार्वजनिक केला; Screenshots पाहून जगभर राजकीय भूकंप

Published by:Jaykrishna Nair

Last Updated:Jan 20, 2026 3:38 PM IST

Donald Trump Leaks Macron Messages: फ्रान्सने ‘बोर्ड ऑफ पीस’मध्ये सहभागी होण्यास नकार दिल्यानंतर अमेरिकेचे अध्यक्ष डोनाल्ड ट्रम्प आक्रमक झाले असून फ्रेंच वाइन आणि शॅम्पेनवर 200 टक्के टॅरिफ लावण्याची धमकी दिली आहे.

इम्पॅक्ट शॉटतुमचा गेटवे लेटेस्ट न्यूज

पॅरिस/वॉशिंग्टन: अमेरिकेचे अध्यक्ष डोनाल्ड ट्रम्प यांनी फ्रान्सवर जोरदार शब्दांत हल्ला चढवला असून, पॅरिसने त्यांच्या प्रस्तावित ‘बोर्ड ऑफ पीस’ मध्ये सहभागी होण्यास नकार देण्याचा विचार केल्यास फ्रेंच वाइन आणि शॅम्पेनवर तब्बल 200 टक्के आयात शुल्क (टॅरिफ) लावण्याची धमकी दिली आहे. याच मुद्द्यावरून ट्रम्प यांनी आपल्या Truth Social या सोशल मीडिया प्लॅटफॉर्मवर फ्रान्सचे राष्ट्राध्यक्ष इमॅन्युएल मॅक्रॉन यांनी पाठवलेला एक खासगी संदेशही सार्वजनिक केला आहे. या संदेशात ग्रीनलँडबाबत ट्रम्प घेत असलेल्या भूमिकेवर मॅक्रॉन यांनी थेट प्रश्न उपस्थित केला होता.

ट्रम्प यांचा फ्रान्सविरोधी रोष वाढण्यामागे आणखी एक कारण म्हणजे पॅरिसकडून वॉशिंग्टनची खिल्ली उडवण्यात आली. अमेरिकेचे ट्रेझरी सेक्रेटरी स्कॉट बेसेंट यांनी ट्रम्प यांना ग्रीनलँडमध्ये एवढा रस का आहे, याचे समर्थन करताना दिलेल्या कारणांवर फ्रान्सने उपरोधिक टीका केली होती. ग्रीनलँड हा डेन्मार्कचा भाग असून, त्याच्या धोरणात्मक स्थानामुळे ट्रम्प प्रशासन विशेष लक्ष देत असल्याचे सांगितले जात आहे.

ट्रम्प नेमके काय म्हणाले?

मी त्याच्या वाइन आणि शॅम्पेनवर 200 टक्के टॅरिफ लावेन. मग तो (मॅक्रॉन) बोर्डात सहभागी होईल. पण त्याला सहभागी व्हायचं नसेल, तरीही तो करू शकत नाही,असे ट्रम्प यांनी फ्रान्सचे राष्ट्राध्यक्ष इमॅन्युएल मॅक्रॉन यांचा उल्लेख करत सांगितले.

अमेरिकेने सुचवलेला ‘बोर्ड ऑफ पीस’ सुरुवातीला युद्धग्रस्त गाझाच्या पुनर्बांधणीसाठी आणि शांतता प्रस्थापनेसाठी आखण्यात आला होता. मात्र या बोर्डाच्या चार्टरमध्ये त्याची भूमिका केवळ गाझापुरती मर्यादित नसल्याचे स्पष्ट होत असून, त्याचा व्याप इतर आंतरराष्ट्रीय संघर्षांपर्यंत वाढू शकतो, असे संकेत मिळत आहेत.

यानंतर ट्रम्प यांनी Truth Social वर मॅक्रॉन यांचा खासगी संदेश पोस्ट केला. या संदेशात मॅक्रॉन यांनी ट्रम्प यांना सांगितले की, इराण आणि सीरिया या मुद्द्यांवर दोघांचे एकमत आहे, मात्र ग्रीनलँडच्या बाबतीत ट्रम्प नेमकं काय करत आहेत, हे त्यांना समजत नाही , असे त्यांनी स्पष्टपणे नमूद केले.

या संदेशात मॅक्रॉन यांनी असेही सुचवले होते की, डावोस येथे होणाऱ्या वर्ल्ड इकॉनॉमिक फोरमच्या काठावर ट्रम्प आणि इतर G7 नेत्यांची भेट घडवून आणता येईल. या बैठकीसाठी युक्रेन, डेन्मार्क, सीरिया आणि रशियाच्या प्रतिनिधींनाही बोलावता येईल, असेही त्यांनी म्हटले होते. शिवाय गुरुवारी ट्रम्प यांना जेवणावर नेण्याचे आमंत्रणही मॅक्रॉन यांनी दिले होते.

फ्रान्सकडून अमेरिकेची खिल्ली

दरम्यान AFP या वृत्तसंस्थेने दिलेल्या माहितीनुसार, फ्रान्सने ट्रम्प यांच्या ‘बोर्ड ऑफ पीस’ या निमंत्रणाला अनुकूल प्रतिसाद देण्याचा कोणताही इरादा नाही, असे स्पष्ट संकेत दिले आहेत. फ्रेंच राष्ट्राध्यक्षांच्या जवळच्या सूत्रांनी सांगितले की, या बोर्डाचा चार्टर फक्त गाझाच्या चौकटीपुरता मर्यादित नाही आणि त्यामुळे फ्रान्स या प्रस्तावाबाबत साशंक आहे.

ग्रीनलँडच्या मुद्द्यावरूनही फ्रान्सने अमेरिकेची थेट थट्टा केली आहे. फ्रान्सच्या युरोप आणि परराष्ट्र व्यवहार मंत्रालयाच्या अधिकृत X अकाउंटवर एक उपरोधिक पोस्ट करण्यात आली. या पोस्टमध्ये स्कॉट बेसेंट यांनी ट्रम्प यांच्या ग्रीनलँडविषयक भूमिकेचे समर्थन करताना दिलेल्या कारणांची तुलना अतार्किक उदाहरणांशी करण्यात आली.

या पोस्टमध्ये म्हटले आहे, जर कधीतरी आग लागण्याची शक्यता असेल, तर अग्निशमन दल हस्तक्षेप करेल – म्हणून आधीच घर पेटवून द्या.

याच धर्तीवर पुढे असेही लिहिण्यात आले, जर कधीतरी शार्क हल्ला करू शकतो, तर हस्तक्षेप करावा लागेल म्हणून आधीच लाईफगार्डलाच खाऊन टाका आणि जर कधीतरी अपघात होऊ शकतो, तर नुकसान होईल म्हणून आधीच गाडी जोरात धडकवा.

फ्रान्सची ही उपरोधिक प्रतिक्रिया स्कॉट बेसेंट यांच्या वक्तव्यानंतर आली. बेसेंट यांनी ट्रम्प यांच्या भूमिकेचे समर्थन करत सांगितले होते की, 79 वर्षीय ट्रम्प यांचे लक्ष आर्क्टिक भागातील रशियाकडून भविष्यात उद्भवू शकणाऱ्या धोक्यांवर केंद्रित आहे.

भविष्यात आर्क्टिकसाठी ही लढाई खरी ठरणार आहे. आम्ही नाटोच्या हमी कायम ठेवू. जर रशियाकडून किंवा इतर कोणत्याही बाजूकडून ग्रीनलँडवर हल्ला झाला, तर आम्हालाही त्या संघर्षात ओढले जाईल, असे बेसेंट यांनी स्पष्ट केले होते.

फ्रान्सची अधिकृत भूमिका

दरम्यान फ्रान्सच्या राष्ट्राध्यक्ष इमॅन्युएल मॅक्रॉन यांच्या जवळच्या सूत्रांनी AFP शी बोलताना ट्रम्प यांच्या टॅरिफ धमकीवर तीव्र प्रतिक्रिया दिली आहे. फ्रेंच वाइन आणि शॅम्पेनवर 200 टक्के आयात शुल्क लावण्याची धमकी ही अस्वीकार्य आणि अप्रभावी असल्याचे या सूत्रांनी स्पष्टपणे सांगितले. आमच्या परराष्ट्र धोरणावर प्रभाव टाकण्यासाठी टॅरिफची धमकी देणे हे पूर्णपणे अस्वीकार्य आहे आणि अशा प्रकारचे दबावतंत्र कधीही प्रभावी ठरणार नाही, असे फ्रेंच सूत्रांनी ठामपणे नमूद केले आहे.