3 लाख रुपयांचा आंबा, यापेक्षा जास्त पैसे देऊन खरेदीसाठी ग्राहक तयार, असं काय आहे यात?

आता इतका महाग आंबा कोणता हे जाणून घेण्यासाठी उत्सुकता तुम्हाला असेल, हा आंबा आहे मियाझाकी आंबा. जो मूळतः जपानमधील क्योशु इथं पिकवला जातो. जपानी ग्रेड मियाझाकी आंब्याचं वजन 350 ग्रॅमपेक्षा जास्त असलं पाहिजे तरच तो खरा मियाझाकी आंबा मानला जातो. त्यात साखरेचं प्रमाण किमान 15 टक्के असावं. त्याचा रंग आणि आकार पूर्णपणे योग्य असावा. या आंब्याला जपानी भाषेत 'Taiyo no Tamago' म्हणतात. याचा अर्थ सूर्याची अंडी. त्याच्या चमकदार रंगामुळे असं म्हटलं जाते. अलीकडे सोशल मीडियामुळे हा आंबा खूप चर्चेत आला आहे.

हा आंबा आता भारतातही अनेकजण पिकवत आहेत . या आंब्याच्या रोपाची किंमत 950 ते 4000 रुपये आहे. ही रोपं टेरेस गार्डनमध्येदेखील लावता येतात. हा आंबा फक्त चवीलाच चांगला नाही तर त्यात औषधी गुणधर्मही आहेत, असे तो पिकवणाऱ्यांचं म्हणणं आहे. या आंब्याची मूळ वनस्पती जपान आणि थायलंडमध्ये आढळते. तिथून कोलकाता आणि काश्मीरमध्ये आणण्यात आली. यानंतर मियाझाकी आंब्याची रोपं आता भारतभर उपलब्ध आहेत. लागवडीनंतर 8-9 महिन्यांनी ही रोपं फुलू लागतात.