पाणी आणायला गेलं आणि थेट तलावात कोसळलं हॅलिकॉप्टर; सेकंदात झाले तुकडे-तुकडे, थरारक Video Viral

24 ऑगस्टच्या संध्याकाळी पश्चिम फ्रान्समधील रॉस्पोर्डन परिसरातील आग विझवण्याच्या माहिमेवर एक हेलिकॉप्टर होतं. त्यावेळी हे हेलिकॉप्टर एका तलावामधून बादलीभरुन पाणी वाहून नेत होतं, त्या दरम्यान हेलिकॉप्टरचा बॅलेंस बिघडला आणि ते कोसळलं, ज्यामुळे हेलिकॉप्टरचे तुकडे तुकडे झाले. सुदैवाने, या अपघातात कोणतीही जीवितहानी झाली नाही. हेलिकॉप्टरमधील कर्मचारी वेळीच बाहेर पडले.

या घटनेचा व्हिडिओ खळबळ माजवणारा आहे. त्यात हेलिकॉप्टरचे शेपूट पाण्यात बुडताना दिसते आणि काही सेकंदांतच त्याचा तोल जातो. हेलिकॉप्टर फिरत पाण्यात आदळते आणि क्षणार्धात तुकडे तुकडे होते.

एक साक्षीदार डेविड यांनी द सनला सांगितले, “ते खूपच खाली आले आणि वेगाने उतरत होते. मला वाटलं ते फुटणार किंवा तुकडे होणार. एकदा ते उलटलं आणि लगेच सर्व दिशांनी फेकलं गेलं.” थिबॉल्ट या युवकाने France3 ला सांगितले की, तो आपल्या मित्रांसोबत तलावाजवळ आराम करत होता. हेलिकॉप्टर येताना पाहून त्याने व्हिडिओ काढला, पण क्षणात अपघाताचा थरार टिपला गेला.