12 वी नापास तरुण पारंपरिक शेतीला कंटाळला, एक निर्णय घेतला अन् कसं बदललं चित्र?

छत्रपती संभाजीनगर : सध्याच्या काळात मराठवड्यातील शेतकरीही आपल्या शेतामध्ये वेगवेगळे प्रयोग करत असतात. बऱ्याच शेतकऱ्यांचा कल हा आता फळबागांकडे आहे. या फळबागांच्या माध्यमातून शेतकरी चांगलं उत्पन्न घेतात. असाच एक प्रयोग छत्रपती संभाजीनगर जिल्ह्यातील ताडपिंपळगाव येथील तरुण शेतकरी आश्विन काळे यांनी देखील केलेला आहे. 12 वी नापास असणाऱ्या काळे यांनी आपल्या शेतात मोसंबीची बाग लावली आणि यातून ते आता लाखोंची कमाई करत आहेत.

अश्विन गोरख काळे हे छत्रपती संभाजीनगर जिल्ह्यातील कन्नड तालुक्यामधील ताडपिंपळगाव गावातील आहेत. अश्विन काळे हे बारावी नापास आहेत. अश्विन काळे यांचे आई वडील दोघाही शेती करायचे. अश्विन हे 2015 पासून शेतीच करत आहेत. त्यांच्याकडे एकूण साडे पाच एकर जमीन आहे. त्या साडे पाच एकर जमिनीपैकी त्यांनी अडीच एकरामध्ये मोसंबीच्या बागांची लागवड केलेली आहे. सुरुवातीला अश्विन हे पारंपारिक पिक घ्यायचे. पण त्यामध्ये त्यांना चांगलं उत्पन्न आणि पाहिजे तसा नफा होत नव्हता. म्हणून त्यांनी मोसंबीची बाग लावण्याचा निर्णय घेतला.