आत्महत्येची मालिका थांबेना! कर्जबाजारीपणाला कंटाळून शेतकऱ्याने संपवलं जीवन

मिळालेल्या माहितीनुसार, प्रताप आमटे हे नेहमीप्रमाणे मंगळवारी सकाळी आपल्या शेतात गेले होते.मात्र, त्या दिवशी त्यांच्या मनात काय घडत होते, हे कोणीच ओळखू शकले नाही. शेतामध्ये एकटे असतानाच त्यांनी झाडाला दोरी बांधून गळफास घेतला. काही वेळानंतर शेजारील शेतकरी शेताकडे गेले असता ही धक्कादायक घटना त्यांच्या निदर्शनास आली.

ही घटना एकटीच नाही. राज्यातील शेतकऱ्यांची आत्महत्या ही आता एक गंभीर सामाजिक संकट बनली आहे. राज्याचे मदत व पुनर्वसन मंत्री मकरंद जाधव (पाटील) यांनी यापूर्वी विधानसभेत माहिती दिली होती की, 1 जानेवारी ते 31 डिसेंबर 2024 या कालावधीत फक्त विदर्भ आणि मराठवाडा विभागात 2,706 शेतकऱ्यांनी आत्महत्या केल्या.