आठवड्याच्या सुरुवातीलाच आवक वाढली! सोयाबीनच्या दरात घसरण होणार?

मुंबई : राज्यातील सोयाबीन बाजारभावात मागील काही दिवसांत चढ-उतार पाहायला मिळत असून, विविध बाजार समित्यांमध्ये आवक आणि गुणवत्तेनुसार दरात फरक दिसून येत आहे. 14 आणि 15 डिसेंबर 2025 रोजी मिळालेल्या आकडेवारीनुसार सोयाबीनला काही ठिकाणी समाधानकारक दर मिळाले असले तरी, काही बाजारांमध्ये शेतकऱ्यांना अपेक्षित भाव मिळत नसल्याचे चित्र आहे. त्यामुळे शेतकरी वर्गात सध्या संभ्रमाची स्थिती निर्माण झाली आहे.

advertisement

आजचे बाजारभाव काय?

आज 15 डिसेंबर रोजी नागपूर बाजार समितीत लोकल सोयाबीनची 661 क्विंटल इतकी आवक नोंदवण्यात आली. येथे किमान दर 3,800 रुपये, कमाल दर 4,416 रुपये तर सरासरी दर 4,262 रुपये प्रति क्विंटल इतका राहिला. नागपूरसारख्या मोठ्या बाजारात सरासरी दर 4,200 रुपयांच्या पुढे राहिल्याने काही प्रमाणात शेतकऱ्यांना दिलासा मिळाला आहे. मात्र आवक वाढल्यास दरावर दबाव येण्याची शक्यता व्यापाऱ्यांकडून व्यक्त केली जात आहे.

14 डिसेंबर रोजी औसा बाजार समितीत पिवळ्या सोयाबीनची सर्वाधिक 2,288 क्विंटल आवक झाली. येथे किमान दर 4,001 रुपये, कमाल दर 4,582 रुपये तर सर्वसाधारण दर 4,432 रुपये नोंदवण्यात आला. औसा बाजारात मिळालेला सरासरी दर राज्यातील इतर अनेक बाजारांच्या तुलनेत चांगला मानला जात असून, दर्जेदार मालाला जास्त भाव मिळत असल्याचे चित्र आहे.

बुलढाणा बाजार समितीत पिवळ्या सोयाबीनची 400 क्विंटल आवक झाली. येथे किमान दर 3,800 रुपये, कमाल दर 4,250 रुपये तर सरासरी दर 4,025 रुपये इतका राहिला. त्याच जिल्ह्यातील बुलढाणा-धड बाजारात केवळ 119 क्विंटल आवक झाली असून, येथे किमान 3,600 रुपये तर कमाल 4,350 रुपये दर मिळाला. सरासरी दर 4,000 रुपये राहिल्याने कमी आवकेमुळे दर काहीसे स्थिर राहिल्याचे दिसून येते.

भिवापूर बाजार समितीत पिवळ्या सोयाबीनची 1,002 क्विंटल आवक झाली. मात्र येथे किमान दर थेट 3,000 रुपये इतका खाली गेल्याचे दिसून आले, तर कमाल दर 4,600 रुपये नोंदवण्यात आला. सरासरी दर 3,800 रुपये राहिल्याने कमी दर्जाच्या मालामुळे बाजारभावावर मोठा परिणाम झाला.

काटोल बाजारात 202 क्विंटल आवक झाली असून, येथे किमान दर 3,000 रुपये तर कमाल दर 4,565 रुपये इतका राहिला. सरासरी दर 4,250 रुपये मिळाल्याने चांगल्या प्रतीच्या सोयाबीनला समाधानकारक भाव मिळाला आहे. देवणी बाजार समितीत आवक अत्यल्प म्हणजेच 67 क्विंटल इतकी होती. येथे किमान दर 4,000 रुपये, कमाल दर 4,639 रुपये तर सरासरी दर 4,320 रुपये राहिला.