TRENDING:
अश्विनी शहाजी मोरे (वय 23) असे पीडित विवाहितेचे नाव आहे. 12 जानेवारी 2026 रोजी दुपारी साडेबारा वाजण्याच्या सुमारास ही घटना घडली. घरात कपडे धुण्याचे काम सुरू असताना अश्विनीचा मुलगा शिवांश आणि दिराचा मुलगा सुरज यांच्यात क्षुल्लक कारणावरून भांडण झाले. त्यावेळी सासरे मोहन साधू मोरे यांनी थेट शिवांशला मारहाण करण्यास सुरुवात केली.
advertisement
भल्या पहाटे आले, बेडरूमला कडी घातली अन्..., चोरट्यांचं धक्कादायक कांड, बीडमध्ये खळबळ
मुलाला मारहाण का केली जात आहे, असा सवाल अश्विनीने केला असता तिच्यावरच संताप व्यक्त करण्यात आला. पती शहाजी मोहन मोरे याने अश्विनीला अश्लील भाषेत शिवीगाळ करत मारहाण केली. या हिंसाचारात सासू विजयमाला मोहन मोरे हिने गरम केलेला लोखंडी गज पतीच्या हातात दिल्याचा गंभीर आरोप तक्रारीत करण्यात आला आहे.
पतीने तापलेल्या लोखंडी गजाने अश्विनीच्या डाव्या पायाच्या पोटरीवर तसेच हातावर एकूण पाच ठिकाणी चटके दिले. एवढ्यावरच न थांबता सासऱ्याने “हिला जिवंत पेटवून द्या” असे चिथावणीखोर वक्तव्य केल्याचेही तक्रारीत नमूद आहे. गंभीर जखमी अवस्थेत असतानाही तिला उपचारासाठी जाण्यापासून रोखण्यात आले.
अखेर अश्विनीने धैर्य दाखवत आपल्या वडिलांना फोन करून घटनास्थळी बोलावून घेतले. अंबाजोगाई येथे उपचार घेतल्यानंतर तिने बर्दापूर पोलीस ठाण्यात अधिकृत तक्रार नोंदवली. या प्रकरणी भारतीय न्याय संहितेच्या कलम 118, 115 (2), 351 (2) व 3 (5) अन्वये पती, सासू आणि सासऱ्याविरुद्ध गुन्हा दाखल करण्यात आला असून, पोलीस निरीक्षक ज्ञानेश्वर कांबळे यांच्या मार्गदर्शनाखाली पोलीस हवालदार समाधान भाजीभाकरे पुढील तपास करीत आहेत.
Click here to add News18 as your preferred news source on Google.