TRENDING:
डॉ. कराड म्हणाले, आजकाल तरुणांमध्ये जलद वजन कमी करण्याची स्पर्धाच सुरू आहे. पार्टी, प्रवास किंवा काही दिवस जंक फूड खाल्ल्यानंतर डिटॉक्स करण्याची फॅशन वाढली आहे. पण अतिशय कमी कॅलरीचा आहार घेतल्यामुळे मायक्रोन्यूट्रिएंट्सची कमतरता निर्माण होते. शरीरातील जीवनसत्त्वे, मिनरल्स, प्रोटीन्स यांचे प्रमाण घटल्याने इम्युनिटी कमकुवत होते. परिणामी ताण, थकवा, केस गळणे, त्वचेचे विकार आणि हार्मोनल असंतुलन निर्माण होते.
advertisement
ते पुढे म्हणाले, दीर्घकाळ क्रॅश डाएट केल्यास शरीरातील मेटाबॉलिझम मंदावतो. आधी जसे खाणे चालायचे तसेच खाल्ले तरी वजन वाढू लागते. काही वेळा स्नायूंचा ऱ्हास होऊन व्यक्ती बारीक दिसते, पण आतून शरीर कमकुवत झालेले असते. काही डिटॉक्स पावडर किंवा हर्बल पेयांमध्ये हानिकारक धातू, रसायने आढळल्याच्या तक्रारीही वाढत आहेत. अशा पदार्थांमुळे यकृत आणि मूत्रपिंडांवर ताण येऊ शकतो. ऑक्सिडेटिव्ह स्ट्रेस वाढल्यामुळे दीर्घकाळात कर्करोगाचा धोका निर्माण होण्याची शक्यता असते.
वजन कमी करणे किंवा ते योग्य राखणे ही वन टाइम गोष्ट नसून सतत चालणारी प्रक्रिया आहे. अचानक वजन कमी करण्याच्या मागे धावल्यास शरीरात गंभीर पोषणतुटी निर्माण होतात. डाएट करताना प्रमाणित न्यूट्रिशनिस्ट किंवा ट्रेनरचा सल्ला घेणे अत्यावश्यक आहे. सोशल मीडियावरील सर्व ट्रेंड्स वैज्ञानिकदृष्ट्या योग्य असतातच असे नाही, असे डॉ. कराड यांनी सांगितले.
एकूणच, सोशल मीडियावरील आकर्षक व्हिडिओ पाहून तरुण स्वतःच्या आरोग्याशी तडजोड करत असल्याचे तज्ज्ञांचे निरीक्षण आहे. योग्य आहार, सातत्यपूर्ण व्यायाम, पुरेशी झोप आणि तणावमुक्त जीवनशैली हेच दीर्घकाळ फिट राहण्याचे खरे मार्ग आहेत.