Bajaj: पैसे छापायची मशीन! कारसारखे फिचर्स आणि कमाईसाठी बेस्ट अशी बजाजची GoGo P7012

भारतात सध्या ईलेक्ट्रिक वाहन खरेदीकडे कल वाढत चालला आहे. स्कुटर, दुचाकी किंवा कार असेल सगळ्याच प्रकारामध्ये उत्तम रेंज देणारी इलेक्ट्रिक वाहनं बाजारात उपलब्ध आहे. एवढंच नाहीतर मालवाहू वाहनं सुद्धा आता ईलेक्ट्रिक सेगमेंटमध्ये पाहण्यास मिळत आहे. अशातच रोजच्या प्रवासातला महत्त्वाचा भाग असलेला रिक्षा सुद्धा इलेक्ट्रिक सेगमेंटमध्ये उपलब्ध आहे. बजाजने यामध्ये बाजी मारली आहे. बजाजच्या GoGo P7012 नावाच्या इलेक्ट्रिक रिक्षाने विक्रीचे सर्व रेकॉर्ड मोडीत काढले आहे. कारसारखे फिचर्स आणि दमदार रेंजमुळे ही रिक्षा अल्पवधीतच अनेक घरांचं आर्थिक कमाईचं साधन ठरलं आहे.

बजाज गोगो पी७०१२ पॅसेंजर ई-ऑटोच्या जोरदार मागणीमुळे एप्रिल २०२५ मध्ये बजाज ऑटोने भारतातील इलेक्ट्रिक थ्री-व्हीलर बाजारात अव्वल स्थान मिळवलं आहे. वाहन पोर्टलवरील आकडेवारीनुसार, बजाज ऑटोने एप्रिलमध्ये ५,५०६ इलेक्ट्रिक तीन चाकी वाहनं विकली, जी या  सेगमेंटमध्ये सर्वाधिक आहे. बजाजची ही रिक्षा आता नंबर १ ब्रँड बनली आहे.

GoGo P7012 मध्ये २५१ किमीची रेंज आहे ही तिची सगळ्यात चांगली बाजू आहे. या रिक्षामध्ये २-स्पीड ऑटोमॅटिक ट्रान्समिशन, फुल मेटल बॉडी, वाढलेली केबिन स्पेस आणि हिल होल्ड असिस्ट, अँटी-रोल डिटेक्शन आणि ऑटो हॅझार्ड लाइट्स सारख्या अनेक फिचर्स दिले आहे.

बजाज गोगो इलेक्ट्रिक रिक्षाची  डिझाइन पूर्ण मेटल बॉडीची आहे. ५ वर्षांची बॅटरी वॉरंटी, प्रशस्त सीट, सामान ठेवण्यासाठी जागा, ट्विन-शॉक अ‍ॅब्झॉर्बर्ससह टेलिस्कोपिक सस्पेंशन दिले आहे.

बजाज ऑटो, जी आधीच इंटरनल कम्बशन इंजिन (ICE) तीन चाकी वाहनांमध्ये ७४% वाटा घेऊन बाजारपेठेत आघाडीवर आहे, तिने आता इलेक्ट्रिक क्षेत्रातही आपले वर्चस्व पुन्हा एकदा प्रस्थापित खेळाडूंना मागे टाकत पुन्हा एकदा आपले स्थान निर्माण केलं आहे.

या रिक्षाचा टॉप स्पीड हा ५० किमी प्रतितास इतका आहे. एवढंच नाहीतर रिक्षामध्ये २ स्पीड ऑटोमॅटिक गिअरबॉक्सही दिला आहे. तसंच चार्जिंगसाठी पूर्णपणे डिजिटल LCD इन्स्ट्रुमेंट क्लस्टर आणि USB टाइप-A पोर्ट दिले आहे.

P5009, P5012 आणि P7012 मध्ये  P म्हणजे पॅसेंजर आणि 50 आणि 70 आकार दर्शवितात. शेवटी, 09 आणि 12 म्हणजे 9 kWh आणि 12 kWh बॅटरी यामध्ये दिली आहे.  बजाजने GoGo P5009 ची किंमत 3,26,797 रुपये (एक्स-शोरुम) इतकी ठेवली आहे. यामध्ये 12 kWh बॅटरी पर्याय दिला आहे. तर GoGo P7012 ची किंमत 3,83,004 रुपये (एक्स-शोरुम) इतकी आहे.