Madhuri Dixit : 'तेव्हाही ती...' अशोक सराफांनी सांगितली माधुरी दीक्षितबद्दलची खास गोष्ट, म्हणाले...

मराठी सिनेसृष्टीच्या गळ्यातील ताईत असलेल्या अशोक सराफ यांनी नुकतंच एका मुलाखतीत अनेक खुलासे केले आहेत. आपल्या कारकिर्दीत आलेले अनुभव शेअर करताना अशोक सराफ यांनी काही कलाकारांसोबतच्या आठवणीही सांगितल्या.

सलमान खान, शाहरुख खान, सचिन पिळगांवकर यांच्यासह अनेक कलाकारांबद्दल ते बोलले. यावेळी त्यांनी बॉलिवूडची धकधक गर्ल माधुरी दीक्षितबद्दलही त्यांचं मत व्यक्त केलं आहे. अशोक सराफ काय म्हणाले, पाहूयात.

मराठीसह अशोक सराफ यांनी अनेक हिंदी चित्रपटांमध्येही काम केलं आहे. त्यांनी 'करण अर्जुन', 'येस बॉस', 'अबोध', 'सिंघम' अशा अनेक हिंदी सिनेमांमध्येही आपल्या अभिनयाची छाप सोडली.

दरम्यान, १९८४ साली आलेला राजश्री प्रोडक्शनचा ‘अबोध’ हा माधुरी दीक्षितचा पहिलाच चित्रपट. यावेळी माधुरी केवळ दहावीमध्ये होती. अशोक सराफ यांनी त्यांच्या नव्या मुलाखतीत माधुरीसोबत काम करण्याचा अनुभव सांगितला आहे. यावेळी त्यांनी माधुरीचा स्वभाव, ती आधी कशी होती आणि आता कशी आहे, अशा वेगवेगळ्या गोष्टी सांगितल्या.

मुलाखतीत बोलताना अशोक सराफ यांनी सांगितलं, "मी राजश्रीबरोबर ‘अबोध’ चित्रपट केला, त्यात माधुरी पण होती. तेव्हा ती शाळेत शिकत होती. अगदी साधी मुलगी, शांत बसली होती. तिचा चेहरा, तिचं सौंदर्य कमाल होतं. माधुरी दहावी-अकरावीत होती. तिच्या शाळेमुळे शूटिंगही थांबवण्यात आलं होतं. माधुरीला सुट्टी मिळाल्यानंतर आमचं शूटिंग सुरू झालं होतं."

ते पुढे म्हणाले, "तो तिचा पहिलाच चित्रपट होता. राजश्रीबरोबर तो माझाही पहिलाच चित्रपट होता. नंतर आम्ही अनेक चित्रपट केले. माधुरी अजिबात बदलली नाही. ती आजही तशीच साधी मुलगी आहे. मराठी कलाकारांना फक्त मेहनतीने काम करायचं असतं. माधुरीही अशीच होती आणि आजही ती तशीच साधी आहे."

अशोक सराफ यांच्या या वक्तव्यातून त्यांचं माधुरीसाठी असलेलं प्रेम आणि आदर दिसून येतो. माधुरी दीक्षित आणि अशोक सराफ यांनी ‘कोयला’, ‘प्रेम दीवाने’ या चित्रपटांमध्ये एकत्र काम केलं आहे. पण ‘येस बॉस’, ‘करण अर्जुन’, ‘सिंघम’, ‘कोयला’, ‘बेनाम बादशाह’ या हिंदी सिनेमांमधील अशोक मामांच्या भूमिका विशेष गाजल्या. काही दिवसांपूर्वीच त्यांना पद्मश्री पुरस्काराने सन्मानित करण्यात आलं असून ते सध्या ‘अशोक मा.मा.’ या मालिकेत काम करत आहेत.