Gautami Patil: गौतमी पाटीलच्या कारचालकाकडून मोठी चूक, रिक्षाला उडवलं, पुण्यातील अपघाताचे PHOTOS समोर

स्टेज असो की अल्बम, आपल्या अदाने घायाळ करणारी गौतमी पाटील सध्या वेगळ्याच कारणामुळे चर्चेत आली आहे. गौतमी पाटीलच्या कारने पुण्यात अपघात केला आहे. गौतमीच्या ड्रायव्हरने भल्या पहाटे एका रिक्षाला जोराची धडक दिली. या अपघातात रिक्षाचालकासह ३ जण जखमी झाले आहे. जखमींना रुग्णालयात दाखल केलं आहे. सुदैवाने यावेळी कारमध्ये गौतमी नव्हती. या घटनेचे फोटो समोर आले आहे.

पुण्यात गौतमी पाटील हिच्या कारला पहाटेच्या सुमारास अपघात झाला. अपघातााच्या वेळी गौतमी कारमध्ये नव्हती. ड्रायव्हर कार चालवत होता. पुण्यातील मुंबई-बंगळूरू राष्ट्रीय महामार्गावरील वडगाव पुलाजवळ ही घटना घडली.

या हॉटेलसमोर रिक्षाचालक उभा होता. रिक्षामध्ये दोन प्रवासी होते. त्याचवेळी भरधाव वेगात आलेल्या गौतमी पाटील हिच्या गाडीने रिक्षाला जोराची पाठीमागून धडक दिली.

ही धडक इतक्या जोरात होती की, रिक्षा काही अंतरापर्यंत ढकलला गेला.  या अपघातात रिक्षाचे मोठे नुकसान झाले आहे.

या अपघातात रिक्षाचालकासह दोन प्रवासी जखमी झाले आहे. अपघात झाल्यानंतर तातडीने लोक धावून आले. त्यांनी जखमी रिक्षाचालक आणि प्रवाशांना तातडीने नजीकच्या रुग्णालयात दाखल केलं.

घटनेची माहिती मिळताच पोलिसांनी घटनास्थळी धाव घेतली. पोलिसांनी गौतमी पाटील हिच्या चालकाला ताब्यात घेतलं आहे. चालकाने गौतमी पाटील हिची कार असल्याचं पोलिसांना सांगितलं आहे.

विशेष म्हणजे, पहाटे पाच वाजेच्या सुमारास ही घटना घडली होती. पण संध्याकाळपर्यंत कुठेही याची वाच्यात झाली नाही. मात्र, सिंहगड पोलिसांनी या प्रकरणी चालकाविरोधात कारवाई केल्यानंतर प्रकरण समोर आलं.