BB 19 च्या घरात शहबाजच्या वडिलांची एन्ट्री, सुपरकूल लूकने वेधलं लक्ष, अत्याचाराच्या आरोपांमुळे आले होते अडचणीत

मुंबई: 'बिग बॉस १९' च्या घरात सध्या 'फॅमिली वीक'मुळे भावूक वातावरण आहे. अनेक स्पर्धकांना त्यांच्या कुटुंबाला भेटण्याची संधी मिळाली आहे. या भेटीदरम्यान, स्पर्धक शहबाज बदेशाचे वडील संतोख सिंह सुख यांनी घरात एंट्री केली. त्यांचा डॅशिंग लूक पाहून घरातले सदस्य आणि सोशल मीडियावरील प्रेक्षक दोघेही चकित झाले आहेत.

मात्र, त्यांच्या या सुपरकुल लूकपेक्षाही ५ वर्षांपूर्वी त्यांच्यावर झालेल्या गंभीर आरोपांची चर्चा इंटरनेटवर पुन्हा सुरू झाली आहे. शहबाजच्या वडिलांचा लूक इतका तरुण आणि आकर्षक दिसत आहे की, ते घरात चर्चेचा विषय बनले आहेत.

संतोख सिंह सुख यांच्या स्टायलिश आणि यंग दिसण्यामुळे घराबाहेर इंटरनेटवर त्यांच्याबद्दल अनेक गप्पा रंगू लागल्या आहेत. घरात वडिलांची एंट्री होताच शहबाज खूप आनंदित झाला. विशेषतः अशनूर कौरला शहबाजचे वडील खूप आवडले आहेत.

संतोख सिंह सुख हे अभिनेत्री शहनाज गिलचे वडील आणि शहबाज बदेशाचे पिता आहेत. २०२० मध्ये त्यांच्यावर झालेल्या एका गंभीर आरोपामुळे ते अडचणीत सापडले होते.

मे २०२० मध्ये एका ४० वर्षीय महिलेच्या तक्रारीवरून संतोख सिंह सुख यांच्याविरुद्ध बलात्काराचा गुन्हा दाखल करण्यात आला होता. महिलेने आरोप केला होता की, १४ मे २०२० रोजी ब्यास येथील एका पुलाजवळ, संतोख सिंह सुख यांनी तिला आपल्या कारमध्ये बंदुकीच्या धाकावर धमकावून बलात्कार केला. ब्यास पोलिसांनी त्यांच्यावर कलम ३७६ आणि ५०६ अंतर्गत गुन्हा दाखल केला होता.

या आरोपांनंतर संतोख सिंह सुख यांनी यावर स्पष्टीकरण दिले होते. संतोख सिंह आणि त्यांच्या कुटुंबीयांनी हे आरोप खोटे आणि त्यांना बदनाम करण्याचे षड्यंत्र असल्याचे सांगून पूर्णपणे फेटाळले होते. त्यांनी आपली निर्दोषता सिद्ध करण्यासाठी सीसीटीव्ही फुटेजसह अनेक पुरावे असल्याचा दावा केला होता.

जून २०२० मध्ये संतोख सिंह यांनी सोशल मीडियावर एक पोस्ट शेअर करून सत्याचा विजय झाल्याचे जाहीर केले होते. त्यांनी विजयाचे चिन्ह दर्शवणारा फोटो पोस्ट करत लिहिले होते, "थोडा वेळ लागला, पण सत्याचा विजय झाला."

सध्या शहबाज आणि अशनूरच्या वादामध्ये अशनूरच्या वडिलांनी शहबाजला गंमतीने खडसावले होते, पण आता शहबाजचे वडील घरात आल्याने त्यांचे बोलणे कसे होते हे पाहणे उत्सुकतेचे ठरेल.