Marathwada Weather Update: मराठवाड्यात पारा घसरला; बीड, परभणीत थंडीची लाट, आजची हवामान स्थिती

राज्यात तापमानाचा पारा घसरला असून थंडीचा कडाका चांगलाच वाढला आहे. काही ठिकाणी थंडीची लाट निर्माण झाल्याची स्थिती आहे. मराठवाड्यातील काही जिल्ह्यांत तापमानाचा पारा 9 अंशांपर्यंत घसरला आहे.

मराठवाड्यातील बीड, परभणी या जिल्ह्यांत थंडीची लाट निर्माण झाली आहे. हवेत गारवा वाढला असून सर्वत्र शेकोट्या पेटल्याचे चित्र आहे. येथील किमान तापमान 9 अंशांपर्यंत नोंदवलं गेलंय. तर पुढील काही दिवस हीच स्थिती कायम राहण्याचा अंदाज आहे.

मराठवाड्यातील सर्वात कमी तापमानाची नोंद परभणी आणि बीडमध्ये झाली आहे. त्यानतंर नांदेड आणि धाराशिव 10 अंश सेल्सिअस तर हिंगोली आणि लातूरमध्ये आज 12 अंश सेल्सिअस तापमान राहील. तसेच सकाळी धुक्याची तीव्रता अधिक राहील आणि दिवसभर हवामान कोरडे राहील.

मराठवाड्याची राजधानी मानले जाणाऱ्या छत्रपती संभाजीनगर शहरात देखील पारा घसरला आहे. किमान तापमान 10 अंशांपर्यंत नोंदवलं गेलंय. आज देखील किमान तापमानाची हिच स्थिती कायम राहणार असून सकाळी शहरात दाट धुके पडत आहे.

दरम्यान, सातत्याने बदलणाऱ्या हवामानामुळे शेतकऱ्यांनी पिकांची आणि फळाबागांची काजळी घ्यावी. थंडी वाढल्यामुळे आता शेतातील पिकावरती सकाळच्या वेळी दवबिंदू पडायला सुरुवात झालेली आहे. तर वाढत्या थंडीमुळे आरोग्याची देखील काळजी घ्यावी लागेल.