Marathwada Weather Update: परभणी, बीडमध्ये पारा घसरला, मराठवाड्यात कडाक्याची थंडी, पाहा हवामान अंदाज

महाराष्ट्रात थंडीचा जोर चांगलाच वाढला आहे. काही ठिकाणी थंडीची लाट निर्माण झाल्याची स्थिती असून मराठवाड्यात देखील पारा घसरला आहे. काही ठिकाणी तापमान 10 अंशांच्या खाली नोंदवण्यात आलंय.

मराठवाड्यातील परभणी आणि बीडमध्ये थंडीची लाट आहे. आज तापमानात काहीशी वाढ होण्याची शक्यता असून किमान तापमान हे 11 अंश सेल्सिअस एवढे असेल. सकाळी धुक्याचे सावट असून नागरिक थंडीमुळे शेकोट्या पेटवत आहेत.

नांदेड आणि हिंगोलीमध्ये किमान तापमान हे 12 अंश सेल्सिअस असेल. धाराशिव आणि लातूर या जिल्ह्यामध्ये देखील थंडीचा जोर असून किमान तापमान 12 अंशांवरच राहील. तर हवामान कोरडे असणार आहे.

छत्रपती संभाजीनगरमध्ये देखील गेल्या काही दिवसांपासून प्रचंड गारठा आहे. आज किमान तापमान 12 अंशांवर राहणार असून कमाल तापमान 28 अंश सेल्सिअस राहील.

वातावरणातील बदलांचा मानवी आरोग्यावर आणि शेती पिकांवर देखील परिणाम होत आहे. त्यामुळे आरोग्याची काळजी घ्यावी लागणार आहे. तर शेतकऱ्यांना देखील आपल्या पिकांना सांभाळावे लागेल.