पावसाची उघडीप, पुन्हा थंडीचा जोर! मराठवाड्यात पारा घसरला, आज काय स्थिती?

राज्यात गेल्या काही दिवसांत हवामानात सातत्याने बदल जाणवत आहेत. मराठवाड्यात गेल्या आठवड्यात अवकाळी पावसाने हजेरी लावली होती. त्यामुळे थंडीची तीव्रता काही प्रमाणात कमी झाली होती. आता पुन्हा थंडीचा जोर वाढत आहे.

मराठवाड्यात रात्री थंडी तर दिवसा कडक ऊन असे चित्र आहे. काही ठिकाणी किमान तापमान 15 अंशांपर्यंत घसरलं असून कमाल तापमान तिशीपार कायम आहे.

मराठवाड्यातील सर्व जिल्ह्यांमध्ये स्वच्छ सूर्यप्रकाश आणि कोरडं हवामान पाहायला मिळेल. आता पावसाची कोणतीही शक्यता नाही. आकाश निरभ्र असणार आहे.

छत्रपती संभाजीनगरमध्ये आज सकाळी धुके आणि नंतर निरभ्र आकाश राहणार आहे. तसेच कमाल तापमान 30 अंश सेल्सिअस तर किमान तापमान 15 अंश सेल्सिअस इतके असणार आहे. थंडीचा जोर वाढल्याने नागरिक स्वेटर आणि इतर कपड्यांची खरेदी करत आहेत.

जालना, हिंगोली आणि बीड या जिल्ह्यांत किमान तापमान 17 अंश सेल्सिअस एवढं आहे. तर धराशिव, नांदेड लातूर आणि परभणी या जिल्ह्यांत किमान तापमान 18 अंश सेल्सिअस आहे. हवामानात सातत्याने बदल होत असल्याने शेतकऱ्यांना आपल्या शेती पिकांची योग्य ती काळजी घ्यावी लागेल.