काळजी घ्या! मराठवाड्यात पारा घसरला, हवामानाबाबत महत्त्वाचं अपडेट

राज्यातील हवामानात सातत्याने बदल जाणवत आहेत. मराठवाड्यात गेल्या काही दिवसांपासून तापमानाचा पारा घसरला असून थंडीचा जोर वाढला आहे. पुढील काही दिवसांत थंडीची तीव्रता आणखी वाढण्याची शक्यता आहे.

मराठवाड्यात मागील आठवड्यात अवकाळी पाऊस झाला. आता आकाश निरभ्र राहणार असून पावसाची कोणतीही शक्यता नाही. रात्री आणि पहाटे थंडीचा जोर वाढला असून काही ठिकाणी पारा 12 अंशांपर्यंत घसरला आहे.

छत्रपती संभाजीनगरमधील तापमानात मोठी घट झालीये. कमाल तापमान 29 अंश सेल्सिअस तर किमान तापमान 12 अंश सेल्सिअस इतके असणार आहे. शहरात सकाळचा वेळी धुके वाढले असून पुढील काही दिवसांत थंडीचा जोर आणखी वाढण्याची शक्यता आहे.

मराठवाड्यातील किमान तापमानात मोठी घट झालीये. मंगळवारी परभणी जिल्ह्यात सर्वात कमी तापमानाची नोंद झाली. परभणी मध्ये किमान तापमान 13 अंश सेल्सिअस एवढं राहिलं. तर धराशिव, नांदेड, लातूर या जिल्ह्यांत किमान तापमान 16 अंश सेल्सिअस एवढं आहे.

हिंगोली, बीड आणि जालना या जिल्ह्यात देखील किमान तापमान आहे 16 अंश सेल्सिअस असून तापमानामध्ये अजून घट होण्याची शक्यता आहे. तापमानात झपाट्याने घट होत असल्याने नागरिकांनी आपल्या आरोग्याची काळजी घेणे गरजेचे आहे. त्याचबरोबर शेतकऱ्यांनी आपल्या शेतात पिकांची आणि फळबागांची देखील काळजी घ्यावी.